السبت، 29 مايو 2010

لو معاك مليون جنيه


لو معاك مليون جنيه
كنت تعمل بيهم ايه
قولي بس على الي بتحلم بيه
 
 
كنت تاكل ايه ؟كنت تلبس ايه ؟
كنت تشتري عربيه جامده وتعمل بيه
ولا تشتري بيت فى المدينه
وتتجوز بت حلوه وتملا اديها صيغه
ولا اقول خدلك فيلا فى مارينا
رد قالي :
بس حيلك على الاحلام شويه
كل ده بمليون جنيه ؟؟
 
انت نايم ولا ايه ؟؟
هاتهم انت وانا عارف هاعمل ايه
 

 =====================================


صحيح قلولي
لو صبحنا الصبح كل واحد مننا معاه مليون جنيه
كام واحد فينا هايوضب نفسه وحياته بشكل عاقل من غير ما يبوظ الدنيا
وكام واحد هايخربها ويقعد على تلها
والبلد هايحصل فيها ايه
السوق هايحصل فيه ايه ؟؟
اقولكم انا
هاتحصل حاله جنونه من شراء الاطعمه والسلع الاستهلاكيه
هايحصل تمرد على الاعمال
هايحصل ارتفاع جنوني فى الاسعار من كل ناحيه
الدنيا هاتبوظ خالص خالص
البلد هاتخرب
السوق هاتبوظ
الناس اخلاقها هاتتغير
العيال هايبوظوا
 
هى دلوقتي لا مش بايظه طبعا ده ماشيه زي الحلاوه
بس تفتكروا بعد ما كل واحد ياخد مليون جنيه
مش على الاقل بعد ما يفرقعهم ويبوظ بيه الاقتصاد العظيم الجامد بتاع البلد
هايبقى على الاقل يعنى عنده بيت يتاويه وعربيه وبياكل لحمه زي خلق الله عادي ؟؟
على الاقل تسعين فى الميه من الشعب هايبقوا كده
صح ولا لا ؟
بعد سنه واحده الامور هاتستقر وهاتبقى ميت فل وخمستاشر
مجنونه انا صح ؟
سطحيه
عايزه اخرب الدنيا
 
قولولي بجد لو خدتم كل واحد فيكم مليون جنيه تعملوا بيهم ايه ؟؟
انا لا مجنونه ولا سطحيه وعارفه انها تبقى كارثه لو صحينا الصبح كل واحد فينا فى ايده مليون جنيه
بس ارجع وابص قدامي
واشوف ناس بتنحت الصخر عشان بي ياكلوا
واشوف ناس بيتعذبوا ويتهانوا ويتبهدلوا عشان هما ربنا اختارهم لابتلاء المرض
باشوف اطفال شوارع مش لاقين اللقمه الحاف
باشوف جواعى
باشوف يتامى قاطمين ظهر امهم
باشوف يتامى فى دور ايتام محبوسين بدون اكل ولا رعايه ولا احترام لادميتهم
شايفه شباب وبنات زي الورد قاعدين من غير جواز لحد سن الاربعين غالبا لضيق ذات اليد
شايفه ناس كتير متبهدلين فى بلاد الله كلها املا بس انه يكون عنده بيت ولا يقدر يعيش حياه كريمه
شايفه الناس اخلاقها باظت والعيال مستقبلهم ضايع من قبل ما يبدأوا حياتهم اصلا

شايفه ناس بتتعذب بدون اي سبب مقنع

حد يدينى سبب واحد بس

يخلينا نرضى بكده
 
 
 طبعا انتم عارفين انا باتكلم على مليون جنيه صينى
اه حتى شايفين الصوره الى فوق ؟

ايه ؟؟ مافيش جنيه صينى؟؟!!

لا ما انا هابقى اغيرلهم العمله هناك واخليها جنيه

هناك 43 تعليقًا:

صيدلانيه طالعه نازله يقول...

يوووووووووه يا ندى
لو ده حصل و لو انى عارفه نفسى بركه مووووووت
اول حاجه حاشترى عربيه ليا طبعا
و مش لحد تانى و كل واحد بقى عارف الكلام على مين
هههههههههههههه
ثانى حاجه حاشترى شاليه فى شرم الشيخ
بعد كده بقى حاشترى لبس ليا و للولاد و للباشا الكبير
من نفسه برضه
بس قوليلى بقى المليون اصلا حيجولى منين من جدو الباشا و لا من الوقف بتاع ناناه اللى اتفك

غير معرف يقول...

اولا مليون جنيه دي ماتجبش حاجه في الزمن ده... قولي مليون دورار :)

بس عموما انا هشيل الفلوس وموش هشتري حاجه لأني بخيله :))

بجد انا ممكن اشتري حاجه الماظ ... بجدبحبه ونفسي فيه..

هسافر اروبا ادرس شويه وابقا احسن ..

تحياتي

adel يقول...

هاكل بيهم كلهم شوكولاتة :):)

لا ياما هنتج فيلمي بالمشاركة مع اي منتج
ياما هاعمل بيهم مشروعي السري :)
وده عشان سري ميتقالش :):)

سواحة يقول...

فكرتينى بفيلم اسماعيل ياسين الى اتراهن مع شكرى سرحان يصرف ميلون فى شهر :-))
صعبه قوى

بصى الى ممكن اعملة اشترى فيلا فى مكان كويس و ممكن اسلف لاخويا و ولاد خالى يعملوا مشروع سوا يخليهم يشتغلوا الى بيحبوه و يستنفعوا و انا اكون شغلت الفلوس
و الباقى فى البنك
يروح و لا يجى مش حيفرق معايا حعيش زى ما اناعايشة دلوقتى :-))))

المشكلة الفلوس غالبا بتجيب فى رجلها مشاكل و مصايب
و ده الى بيتعب

قلم رصاص يقول...

ايه دا ياناس
بتفرج على فيلم بخيت وعديله؟
ههههههههههههههههه

بس فكره حلوه اوي بصراحه انك تطرحيها هنا في المدونه

او معايا المليون جنيه هاكون عاقل جدا طبعا .. ممكن مثلا اعمل مكتب استيراد وتصدير صغير كدا واستورد حاجات كتير من الصين بالذات واغرقكم بيها واضحك عليكم على انها تايواني وماليزي وياباني لحد ما اعمل المليون التاني والتالت


وبعدييييييييين اخدهم واهرب برا مصر
من نفسي يعني اخد لي كام مليون واهرب بيهم اشمعنى انا .. اصله احساس جميل بعيد عنك هههههههههههههههههههه

بس على فكره
فيه ناس كتير اوي معاها ملايين
وعايشين عادي جدا صحيح استهلاكم زايد بردو بس في المعقول والعادي
طبعا انا اقصد ناس شبهنا زيي وزيك كدا
مقصدش الحيتااااااان

موضوع حلو بجد

تقبلي مروري وتحيتي

mrmr يقول...

يووووووووه
فاكرتنى باغنيه كده مش عارفه مين بيغنيها اصلهم يا حبيبتى بقيوا المغنيين ذى الهم على القلب
المهم بيقول فيها ( هما ميه خمسه واربعين جنيه قولى اعمل بيهم ايه ) يا حبه عينى الراجل محتار مش عارف يعمل بيهم ايه ولا ايه
وانتى بتقولى مليووون جنيه يارب ياختى يارب . اقولك اعمل ايه
اولا : قبل كل شى اطلع حق ربنا فيهم
ثانيا : واخذ شقه فى منطقه جميله وهاديه
ما فيهاش ازعاج ولا قرف
ثالثا : اعمل مشروع اللى نفسى ياروحى اعمله هو المشروع مش مكلف ابدا
لكن فى الوقت ده ح اعمله وممكن اقولك نوع المشروع علشان يمكن حبايبنا اللى عايزين يستثمروا فلوسهم يعملوا ايه
يجيبوا شويه ذره شامى من اى زرعه وشويه فحم
ويسلام لو خدوا حته على الكورنيش ويقفوا يشوا الذره
الف من يشترى الذره واحنا فى فتره الصيف وكل الاحبه اثنين اثنين
هههههههه

بس من الاخر احب اقولك
ان محبه المال اصل لكل الشرور من ابتغاه قوم ضلوا وفسدوا
انا مش بحب الفلوس احب اعيش ذى ما انا كده عيشه كريمه وبس

غير معرف يقول...

مليون بس؟

ايه الشح دا

أنا بصراحه هتبرع بيهم (استثمارا) للمجهود الحربي


هع هع هع هع هع

محمد عبد الغفار يقول...

كان عندى زمان خطه للموضوع ده خطه شامله من اكت رمن 10 سنين

دلوقتى خلاص لا تصلح والمليون لا تكفى

غير معرف يقول...

أنا بق عن نفسي الاول هشتري شقه في حي بحبه جدا حوالي 80 : 90 متر بس تكون في الدور 11 أو 12 وكل مكان عالي كل مكان احلي
وبعدها اجيب عربيه صغيره كده تكون علي الزيرو فيات حاجه كده تقضي الغرض وتستحمل وتكون جديده لنج علشان موضوع الميكانيكيه والاعطال والهم ده
وبعدها اطلع علي مدينة العريش اشتري ارض علي البحر او شاليه دور واحد
اصلي بحب اوي المدينه ديه
هاديه وبحرها نضيف اوي وبحرها هادي وناسها طيبين اوي وانا عرفها كويس جدا وليه فيها صحابي واصدقائي ومعارفي عريشيه وكمان فلسطنين رجاله وبنات وستات ومن كل الفئات

وبباقي المليون جنيه هشتري حتة ارض كبيره في مكان كويس علشان افكر بقي اشارك حد واعمل معه مشروع حضانه كويسه تستوعب عدد كبير وفي نفس الوقت حنينه في مصاريفها علي الغلابه
واقدر احفظ فيها قرأن واعلم الاطفال صح ( ده مشورعي اللي هعمله ان شاء رب العباد )
ولا نشتري اكل ولاهدوم ولا ولا دهب
لان انا دلوقتي مش ناقصه اكل باكل كل اللي نفسي فيه وده اللي موديني في داهيه
ودهب عندنا الحمد الله
وهدوم مكسيين وزي الفل والحمد الله
بس هي لو في قناعه باللي في ايد الواحد يبقي احسن لينا كلنا
انا نسيت خالص موضوع المساهمه في علاج الامراض والتكافل بينا وبين بعضنا
بس ان شاء الله لو ربنا قدر وعملت مشروع الحضانه ان شاء الله هيكون نص ارباح الحضانه كل شهر اللي يخصني واللي ميخصنيش ( بتاعت شريكي يعني ) هتطلع لله وللتكافل بينا وبين بعضنا
وهيبقي شرط في العقد بيني وبين اللي هيشركني
ها في حد جي
في حد يقول انا معاكي
في حد يشركني
ههههههههههههههههههههههههههههههه

shimaa elkholy يقول...

صيدلانيه

والله يا بنتى هى سهله اوي بس فى عهد غير العهد

وحلوه عربيه مش لحد تاني

لا شوفي بقى انا بقى كمان مش هاجيب عربيه دلوقتي على حسابي لانى ببساطه هاشتغل بها سواقه عندهم

shimaa elkholy يقول...

فتاه من الصعيد

اه ما انا عارفه انها ما تجيبش حاجه

وايه الحاجات المهمه الى انتى عايزه تعمليها دي
ههههههههههههههههههه
ماشي يا بت يا قنوعه اشتري الماظ

وتلاقي نفسك لابسه خاتم الماظ وواحده تقولك دهب ده ولا فالصوا ؟؟؟؟
وهي دي مصر يا عبله
هههههههههههههههههههههههههههه

وابقى خودينى معاكي اوربا والنبى

shimaa elkholy يقول...

عادل

ازييييييييك انت كنت فين يا عم انت

المدونه بتاعتك يا اخويا مش راضيه تقبل عندي فى الريدر بيقولي مش عارف يقراها حاجه كده هحاول تاني دلوقتي

ومين سري ده ؟

فكرنى ابقى اقعدك على كرسي الاعتراف فى اقرب فرصه
قال سري قال

نورت يا عادل

shimaa elkholy يقول...

واندا

لا انا مش عايزه الناس تصرفهم فى شهر بالعكس

وبعدين صدقينى هاتفرق مش مش هاتفرق فى سلوكك الاستهلاكي وغصب عنك

لكن السؤال الفرق هايكون اد ايه

نسبة الاستهلاك الزياده هاتكون مفزعه

لا اعتقد

المهم بس هما يجوا
هههههههههههههه

ليه بس مصايب ربنا ما يجيبش مصايب ويرزقنا دايما حلالا طيبا

shimaa elkholy يقول...

قلم رصاص

بخيت وعديله اشمعن

بس على فكره حتى لو استوردت من الصين وكتبت عليه تايواني والحركات دي ما تجيبش مليونات اوي يعنى

وعموما خلاص العهد ده انتهى حضرتك دلوقتي فى شهادة جوده

الا اذا كنت هاتقبض رشاوي فى المينا ميه ميه فممكن حاجتك تدخل من غير ما يبصولك اصلا


هو انا قلتلك ان الى معاهم ملايين بيبقوا ماشيين يرموا الفلوس فى الارض

لا طبعا

انا شايفه ان المليون جنيه دي ممكن تضمن لواحد معدم يادوب حياه كريمه
شقه وعربيه ومشروع ياكل منه
بسسسسس

وده حق كل البنى ادمين والله

نورت يا سيد

shimaa elkholy يقول...

مرمر

لا لو كان على الدره عادي تعالى نعمله سوا من غير ملايين يا اختي
ههههههههههههه

ربنا ينولك كل الى فى بالك

بس انا مش بادعوا لمحبة المال وانما لمحبة الرزق
عادي مافيش مشكله لما نرغب فى الرزق الحلال والمعيشه الكريمه الى من حق كل الناس
ما دام عندهم الى يخليهم كده

نورتي يا جميل

shimaa elkholy يقول...

مصري جدا
مجهود حربي

لا خلي عنك يا اخويا اتبرع بيهم لسداد ديون مصر احسن

هع هع هع

shimaa elkholy يقول...

محمد عبد الغفار

طب عايز كام مليون قول بس
ههههههههههههههههه

عموما هو ده المطلوب ان المليون ما عادوش يفسدوا الامر

يادوب معيشه كريمه

تحياتي لك

ميرا ( وومن ) يقول...

فكرتيني بفيلم عربي قديم أسمة مليون جنية
طرح كل هذه التساؤلات واكثر وخلص إلي نتيجة إن المال مفسدة

وعلشان حكومتنا رشيدة بتبعدنا عن المفاسد حرصاً علي مصلحتنا وبتساعدنا علي دخول جنة الخلد

شوفتي بقي قد ايه احنا شعب مفتري وطماع ومش باصين غير لمتاع الدنيا الزائل

shimaa elkholy يقول...

غير معرفه

ايه يا امي كل ده

انتى عايشه فى البلاله

شاليه فى العريش وشقه وعربيه وارض وحضانه
هههههههههههههه

يعنى هو ممكن برضه بس بتهيئلي ما يكفوش

وبرضه انتى بتهيئلك ان عادات الاستهلاكيه مش هاتتغير انما لا طبعا
هاتتغير بس ممكن ما تتغيرش كتير

نورتي يا جميل

shimaa elkholy يقول...

ميرا

بالظببببط كده خايفين على مصلحتنا يا اختي والنبى

ميرا انتى منوراني ونفسي اشوفك المره الى شوفتك فيها ما قعدتش معاكي كفايه كنت مهييسه من التبرع

المال مش مفسده طبعا بشرط يكون حلال والواحد يتقى الله فيه فعلا

بنت وولد يقول...

هما بس يجوا يا ستى و انا حاعمل بيهم البدع

بس اولا يعنى حاجيب عربيه جديده
و بعدين الباقى حدلع بيهم نفسى
اغير الموبايل و اجيب بلاك بيرى و اجيب لابتوب جديد
دلع يا امى
امال ايه
مش فلوسى

ستيتة يقول...

قولي لي انك بتدلعي علشان اسيبك في حالك

ده شاليه سينا بنص مليون
شاليه مارينا ب 2 مليون
شقة حلوة ب 800 الف
عربية نفسي فيها
اه بكاكي عليها بتلاتة اربع مليون
بفرفر عليها كده
بشوفها بيبقى نفسي اقلع الجزمة وانزل ابوس في الحديد :)

مليون ده يعمل ايه يا ام العيال بالصلاة ع النبي

لأ
عدلي المبلغ شوية علشان اعرف احلم براحتي
حتى في الحلم ها تخنقيني :)

بسمة انور يقول...

ممممممممممممم

مليون جنيه
وصينى كمان
دول يجيبو حاجات كتييييير

اولا هتبرع للمحتاجين بنصهم
وبعدين اجيب بربع النص الباقى شكولاته
وبالربع الباقى هجيب لبس واكسسوارات وهحاول اروح اليابان وباريس
بس كده

تحايتى يا خالتو

غير معرف يقول...

علي فكره ياسوسو انا عارفه سعر الاراضي هناك كويس في العريش
الشاليه هناك بارضه ممكن يعمله ربع مليون وكمان تشطيب مثلا 60 الف
والعربيه انا سائله عليها عامله حوالي 40 الف
وشقه محندقه كده تمليك تعمل حوالي 250 الف بتشطبها عارفها هي فين بالضبط ومساحتها اكبر من اللي انا عايزه وفي الدور 10
وكمان الارض كنت بسئل عليها من فتره عامله حوالي 200 متر تقريبا المتر بالف جنيه
ومستنيه بقي شريك يشاركني
العمليه كلها عامله 800 الف مستريح يعني لسه معايا 200 الف
ممكن اعملي بيهم منظر علي شريكي وممكن كمان محتجش شريك خالص وابتدي بدور او دورين في الحضانه لحد مربنا يسهل ومن نص الارباح اكبر الحضانه
يابنتي القناعه كنز
بس هما فيييييييييييين بس
وبعدين المليون لو مش هيقضوا احتياجاتي اشغلهم وباربحهم اقدر اجيب كـــــل اللي نفسي فيه

بس عسل ستيته لما بتقول اقلع الجزمه وانزل ابوس حديدها
مش عارفه عمري محسيت اني نفسي في حاجه لدرجه الولع ديه

shimaa elkholy يقول...

بنت وولد

اهلا بك اولا
انا فتحت البروفايل بتاعك والمدونه وما عرفتش برضه انت بنت ولا ولد ولا انتم اصلا اثنين مش عارفه والله

المهم انك منور يعنى

وبعدين البلاك بيري ده انا فاكراه عدي عليا والنبى

طيب انت مثال جيد على الى هايصرف فلوسه بشكل استهلاكي بحت
ههههههههههههههههه


نورتنا

shimaa elkholy يقول...

سوتيتة حياتي

اهو كلامك ده ياجميل يقول ان المليون جنيه لو اتفرقوا على الشعب الغلبان ده كل واحد مليون جنيه
مش هايحصل حاجه يعنى بشعه فى الاقتصاد

الناس هتاكل وتشرب وتشتري عربيه ولا بيت وبخ على كده

بالذمه ده كتير على الناس يا خالتي ؟؟؟

وبعدين يا جميل انتى تشاوري بس على العربيه وانا تحت امرك اخدك نروح انا وانتى ونقلع الجزم سوا ونبوس
ههههههههههههههه

وبعدين الحكايه مش احلام والسلام الحكايه اكبر من كده
بس يا اختي الباب العالي مانعنى اتكلم بوضوح فى الموضوع
وقالي بمووووتك يا سوسو
قلت بلاش بقى خلينا نربي العيال
ههههههههههه

نورتي يا جميل

shimaa elkholy يقول...

بسمه انور

على فكره الرممبي الصينى قيمته اقل من الجنيه المصري

بس يعنى شكله احلى والنبى وامور
ههههههههههههههههههه

اهو انتى برضه يا بسمتى مثال جيد على الصرف الاستهلاكي
ههههههههههههههههه

حلو اوي ميه ميه
ابقىخدينى معاكي باريس

shimaa elkholy يقول...

غير معرفه

ياواد يا جامد يا حاسبهم انت

ماشي ياعم ظبط نفسك بقى لما يجولك عن قريب يارب

وستيته انا اتفقت معاها خلاص نروح سوا نبوس

فاروق سحير ( فاروق بن النيل ) يقول...

ندى الياسمين ......
المشكلة موش فى المليون جنيه لأن مستوى المعيشة للفرد مرتبط بحاجات كتيرة بإقتصاد البلد بالقيمة الشرائية بالأسعار بالمرتبات بمستويات الترفيه ...إلخ وإذا صبحنا لقينا كلنا معانا مليون جنيه كل واحد كأننا بالضبط معانا المبلغ الحالى قولى مثلا خمسميت جنيه هيه هيه يعنى الأسعار حاتكون متوافقة مع المبلغ اللى معاكى كأنك معاكى خمسميت جنيه دلوقتى أو مليون جنيه بكره هيه هيه وخذى مثل على ذلك بأى بلد أوروبى متطور مثلا ألمانيا عشان مستوى المارك الألمانى ثابت جدا تقريبا منذ عام 1979 حتى الآن صحيح كانت ألمانيا الغربية مختلفة عن ألمانيا الديقراطية قبل هدم سور برلين لكنى زرتها فى هذا الوقت ثم زرتها بع الإتحاد ووجدت المارك الألمانى لم يتغير ( الدولار = 1,76 مارك ألمانى) لقد وجدت عام 1999 أى بعد عشرين سنة نفس الحال مع إختلاف فى التطور والإختراعات ولكن الخادمة تتقاضى ألفين مارك ألمانى لتمسح البلاط والسيراميك وتكنس وهكذا ويادوب تاكل بيها قارنى مستوى المعيشة عندهم وعندنا فى هذا الوقت ستجدى تقريبا مستوى المعيشة واحد مع إختلاف فى الإمكانيات فقط المخترعة بمعنى كان عندهم مترو تحت الأرض عام 1979 والآن نحن عندنا كان بمارك عندهم ساعتها وعندنا الآن بجبنيه وهكذا باقى الأسعار شكرا لك

الازهرى يقول...

تعرفى أول امبارح كنت قاعد مع زمايلى وواحد سأل السؤال ده بس بالدولار
وطبعا الإجابات كانت متباينة
وإجابتىأن الأزلية إنى هأشغلهم فى التجارة وأنزلهم السوق مش فى الفنجرة والكلام الفاضى
وبكده بإذن اللهطبعا هيجيبوا أكتر منهم وأشغلهم برضه والعجلة تفضل دايرة ومن الأرباح أقدر أجيب الأرض والعربيه ويمكن كمان أسمع كلام أمى اللى مغلبها معايا وأجيب العروسة

بس إنت ادعى

shimaa elkholy يقول...

فاروق ابن النيل

انا معاك تماما فى الى انت بتقوله والله

بس يعنى هل خوفا من التضخم الحل اننا نخلي كل الناس جعانين ؟؟

ومع كل ده ما حدش يقول ابدا ان مافيش تضخم

طيب الناس جعانه اهو صح ؟

اه والله العظيم نص الشعب بقى تحت خط الفقر بيجوعوا فعلا ومش لاقيين متوى


طيب شوف حضرتك ال100 جنيه كانت تعمل ايه من عشر سنين

وتعمل ايه دلوقتي ؟

من عشر سنين كان القطاع الخاص بيدى ليوم عمل كامل 150 جنيه وكانواا لناس بيشتغلوا والله عادي
ده اجر عامل


دلوقتي بنعرض 500 جنيه بيقولك اعمل بيهم ايه

ودى حقيقه ال500 جنيه دول ما يكفوش اكل لفرد واحد

طب وبعدين

والحل طب بلاش الحل بتاعي

ادوني انتم حل للشعب الجعان العريان ده

والى قاعد فى النص وفى مجموعة حراميه ولاد تيت بيشقطوا لبعض المليارات من فوقه

حد يقولي بس الحل ايه

تحياتي لحضرتك يا فندم

shimaa elkholy يقول...

ازهري

يا عم انت يا بتاع التجاره انت

شوف يا ازهري اعرف يا ضنايا ان المليون جنيه دول لو قلبتهم فى السوق دلوقتي ياااااادوب تاكل من وراهم عيش وتبقى مستور ده لو انت جدع يعنى

اه والله يادوووووب تخيل بقى؟

اصل حال السوق مترديه الايام دي

بس خلي بالك لو حصل والكل معاه مليون جنيه هاتلعب معاك ما تقلقش
ههههههههههههه

نورت يا ازهري

ahmed_k يقول...

لأ يا أم مريم
انتي بس لايميني على نص مليون
وفي ظرف سنتين أخليهملك 2 مليون

وطبعا لو نظرنا للمليون من الناحيه الإستهلاكيه حنشعر انه مبلغ صغير مقارنة بالأسعار المرتفعه في كل شيئ
ولكن الإستثمار الذي يراعى فيه الحلال ربنا بيبارك فيه وبينميه
لكن أهم شيئ أن كل من لديه يعطي حق من ليس لديه وهذا هو التكافل الإسلامي الذي حضنا الله عليه
فلو كل غني أخرج زكاة ماله كما هو منصوص عليه شرعا
ما احتاج الكثيرين ولتغير حال البلد لوجه آخر مغاير تماما
ولكن التكنيز للأموال لدى طبقات معينه هو ما أوصل الحال لهذا الشكل

تحياتي

ahmed_k يقول...
أزال المؤلف هذا التعليق.
الازهرى يقول...

لالالالالا
انت شكلك مش عارفه السوق أو مش عارفه الأزهرى
المليون دول بإذن ربنا يبقوا اتنين فى أقل من سنة والبقية تأتى

بس انتى هاتيهم واتفرجى على الدمار اللى هيحصل
وكمان حتى لو فرضنا إن السوق العادية نايمة من امتى المخدرات نايمة دى شغالة ولعة والموردين معايا واصحابى وحبايبى ولو مش دي يبقى السلاح خيره كتير وقرشه نضيف

shimaa elkholy يقول...

احمد كيه

الكلام سهل يا فندم
هههههههههههه

المشكله مش مشكلة تكنيز اموال بس

المشكله مشكلة سرقة وفساد

هو الى بيسرق بالملاين يا فندم هايفكر يزكيهم
اذا كان هو حرامي اصلا ؟؟؟

نورت

shimaa elkholy يقول...

الازهري

ههههههههههههه يا لهوي مخدرات وسلاح

ما اعرفوش يا جدعان

UncŁē Sam يقول...

ايوووووووووووووووه يا جدعان
مليون جنيه
مره واحده
دول يطلعوا كام بالمصرى دول
بس بجد كنت هعمل حاجات كتيره تفيد الشعب
كنت هشترى مدونه دوت كوم على طوول :D

shimaa elkholy يقول...

تفيد الشعب

ههههههههههههه

ماشي يا سيدى انا مش عشاني ده انا عشان الناس
ههههههههههههههه

ربنا يوفقك لاكتر من كده ان شاء الله
تحياتي

UncŁē Sam يقول...

وكمان هعمل حاجه مهمه للوطن
هفتح قناه ع الدش
وابيع فيها موبيلات واحط اعلانات ليا كتير اعلان قبل الماتش واعلان بعدالمتش اعلان قبل الاخبار واعلان بعد الاخبار واعلان قبل المسلسل واعلان بعد المسلسل
اها باركيلى بقى بجد انا كسبت بابى ليس من تميمه
طب اعمل بيه انا ايه

shimaa elkholy يقول...

يا رااااااااااااجل

مبرووووووك الف بركه والله

اه يعنى ايه بقى بابي لس معلش اصل انا علامي على ادي يعنى

ههههههههههههه

طب انت هاتعمل اعلان عن نفسك ازاي يعنى عن ايه يعنى

عن المدونه يعنى ؟

طب ما تبقاش تجيب سيرتى فى الموضوع اصل انا هربانه عليا احكام
هههههههههه

UncŁē Sam يقول...

يااااااه
عليكى احكام ومش تقوليلى برده
ده انا اعرف اكااابر البلد دى
اعرف عسكرى وامين شرطه
ههههههاى
اخليهم يخلصوا القضايا اللى عليكى
بس قليلى الاول قتلتى مين
؟؟
البابى ليس ده
البتاع اللى شبه مكواه العر اللى بتتققفل وتفتح ده اللى بيفرد الشعر
اتمنى تكون وفقتم فى فهمى والسلام عليكم ورحمه الله وبركاته
والعشب فدا الوطن والوطن ابقى قابلنى لو لقيته :D

Unknown يقول...

انا مش عايزه غير٢٥٠الف والباقي هجهز بيه العرايس اللي اهليهم مش قادرين علي تجهيزهم