الأحد، 6 يونيو 2010

طالب جامعي يتناول اقراص الطعميه

سلام عليكم
ازيكم يا اهالي البلوجر الكرام
ليا كتير ما رغيتش الحقيقه ولا اكلت ودانكم اكيد مش عارفين تناموا من غير الرغي بتاعي

هاحكيلكم حدوته الاول



انا بقى عشان اوقات بيجيلى انيهار عصبي من كتر التشتيت وانا باعمل اي حاجه تلاقي فى خمسميت ماما بتتقال الى يستحق يترد عليهم مثلا خمسه
فقررت انى فى اوقات معينه ابقى احط هيدفون الموبايل فى وداني واسمع اي حاجه غير مامااااا

فانا كنت شاريه الموبايل جديد عقبال عندكم برضه ويادوب قبل الخطوبه بكام يوم حطيت عليه فايل الاغاني بتاعي حاجه اخر دماغ  بقى
وانا دماغي قديم حبتين لا ثلاث  حبات  اه باسمع جديد برضه بس يعنى تخاطيف كده

المهم انا لا بيا ولا عليا وواقفه باغسل الاطباق فى المطبخ والهيد فون فى وداني  وباسمع سي الاستاذ عبد الوهاب وهو بيبدع وبيقول لا مش انا الى  ابكي ولا انا الى اشكي لو جار  عليا هواااااك تيراارااا

ويادوبك خلص
واسمعلك  صوت كده بيقول بلللللم  الى هو بقبقة مايه شكيت  فى الحوض الصراحه وبعدين فجأه الاقي الصوت ده من الموبايل وشيء كده صوته لا يطاق طالع يقولي وشربت حجرين على الشيشه مع توتو والسبعه وويشه

لا اخفي عليكم بجد بجد اتصدمت صدمه ما بعدها صدمه
البلاي ليست بتاعتي لو شوفتوها وجمبها الاغنيه دي هايجيلكم صدمه قويه

وانا مش متخيله الموبايل جديد يعنى وعارفه انا حاطه عليه ايه كويس

فين بقى على ما استوعبت الصدمه وافتكرت الاتي

ان من شهر كده تقريبا كان عندنا خطوبه عقبال عندكم جميعا
يعنى كانت فى البيت كده عوائليه بس المهم يعنى ساعة الخطوبه ولان العروسه مبخته اخر حاجه ما تعرفش حصل  ايه فى الكمبيوتر والفيلات ومافيش ولا اغنيه عايزه تشتغل

فجت واحده من البنات قالتلى هاتي موبايل انقل عليه فايل مش عارف منين لفين
قلتلها اوك وخدته

ونقلت به الحاجات وعدت الليله يعنى

واتاري الموبايل بتاعي بقى لما شغلت البلاير راح جايب كل فايلات الصوت ومرتبها ابجدي ومديها بقى ومشغل كله على بعضه
ولعلمكم لسه الملف ده على الموبايل عندي
ولقيت فيه حاجات لطيفه والله عربى وانجليزى

بس فيه شوية اغاني الصراحه عايزه الحرق

السؤال بقى

لما بنات امامير جامعين ومحزقين وملزقين يسمعوا اغاني كده
امال حوكشه وعلولك يسمعوا  ايه ؟؟
هاه  يسمعوا ايه ؟؟؟
ولااصلا رقص البنات دول الى هما فى الشارع مزز حضرتك  اتجمعوا فى  البيت عندنا قبل الخطوبه بيوم
وقعدت اتفرج عليهم وهما بيرقصوا يا مصيبتى ايه ده
ما عادش فى بنات
ده بيرقصوا بمطاوي وبيعملوا حاجات  غريبه موت
باقولهم ايه ده يا مواكيس مافيش هنا بنات ولا ايه
قالولي انتى عايزه ايه نرقص بلدي بقى والجو القديم ده
لا دلوقتي الرجاله هما الى بيرقصوا  بوسطهم
قلتلهم طب بس ما تقلوش رجاله  هما فين دول

و مش حجرين على  الشيشه بس بقى
ده انا اكتشفت بلاوي
الى يقولك سجاره بنى مش عارف ايه بينقط وحاجات عجيبه كده

ولا عمك ابو الليف بتاع فى  حد فقعنى زمبه ومش عارفه الباقي


افتكرت  مره عمي الكبير ربنا يديه الصحه كان بيحكيلى على  ان يوما ما كانت منشيتات جريده من الجرايد بتقول (اعرابا عن تدهور الحاله الاقتصاديه والمستوى)
المانشيت بيقول  طالب جامعي يتناول اقراص الطعميه
والصوره لشاب ماسك قرص طعميه وبياكله

شوفتوا الوكسه بقى

على اساس ان الطالب الجامعه ده بقى ايه راجل مستوى طعميه ايه الى بياكلها

طبعا ما كانوش يعرفوا ان بعد خمسين سنه مش هايلاقي قرص الطعميه اصلا

وما كانوش يعرفوا برضه انه هايسمع وشربت حجرين على الشيشه

ولو كانوا يعرفوا انه هايطلع اصلا من الجامعه كالحمار يحمل اسفارا  كانوا هدوا ام الجامعه وكفايه لحد كده

حزينه من قلبي على  تدهور الذوق العام بجد فى كل حاجه مش الاغاني بس

ولا الالفاظ الى بقت تتقال فى الافلام
مش بس افلام للكبار فقط
لا كل الافلام شتيمه وقلة  ادب والفاظ اقل ما يقال  عنها انها بجد سوقيه ودونيه جدا

كانوا فى مدرسة المشاغبين بيقطعوا كلمة ابن الهوهو  الى بيقولها عادل امام

يجوا يتفرجوا بقىىىىىىىىىىىىىىىى

اكتر حاجه بقى غاظتنى يا جودعان وصدمتنى ان الواد ابنى لقيته بعد الخطوبه الميمونه دي بكام يوم ماشي فى الشقه يقولي ياني ياني ياني مش هاعمل كده تاني

اغمن عليا بقى

دعوه الى اصدقائي الشوباب فى المنطقه العربيه كلها
من فضلكم حتى لو سمعتم الاغاني دي زي بعضه انتم حرين فى ذوقكم
بس يعنى عشان خاطري   وخاطر الانسانيه اعملوا يوم فى الاسبوع نضفوا ودانكم واسمعوا حاجه نضيفه
جربوا بس مش هاتخسروا حاجه

والى اللقاء يا  اصدقاء

هناك 35 تعليقًا:

سواحة يقول...

ايه يا دردر الشكل الصريح المجرد التكعيبى للمدونة ده :-))
و بعدين انت غلطانة بتروحى خطوبات و اوعى كمان تقوليلى حتحضرى افراح
لا يا دردر انت كده حتبوظى و وراكى البلاد كلها
لازم تعملهم واقفة بالقبقاب
و بعدين ايه الاغانى ديه ؟؟ انا معديتش عليا بصراحة دا انا متاخرة قوى
بس يا دردر ما الاجنبى برضه بقت الكلمات فيه نيلة يا دردر
لما مرات رئيس فرنسا تغنى و شربت كوكاين و تعمل ازمة دلوية لانها قالت بلد المصدر :-))) يعنىمصر مش حتلق بركاب الاغانى

فاكرة يا دردر لما ريم كانت بتسال على معنى كلمات اغنية ابو الليف ؟ لما كلمة تتقال علنا بلانا و عادى يقى حبه بحبة كله عادى

الا سؤال
اغنية الى كان ابنك بيغنيها ؟؟ الكوبلية الاولانى ايه ؟؟ يعنى ايه الى عمله و لا مش حيعمله
اصل لما تسيبى المعنى فى بطن الشاعر
المواضيع بتروح و بيجى :-))

shimaa elkholy يقول...

يا وندتي العزيزه

اينعم انتى متاخره بشكل وحش

ما اعرفش اناايه موضوع مرات رئيس فرنسا ده

بس كمان ما انا عافه ان فى اغاني اجنبي زفته ما قلناش حاجه

بس مش باسمعها برضه

واه صدقينى المشكله ان الكلمه لما بتتقال كده بتبقى من مفردات العيال بعد كده

وبالنوسبه للاغنيه الى ابنى كان بيغنيها يا ستى هى نفس الاغنيه الى صدمتني
وشربت حجرين على الشيشه

وبالنسبه للى ما عادش هايعمله تاني انه ما عادش هايشرب حجرين على الشيشه

ومش عارف ايه من الحجر ا لاولاني وجربت الحجر التاني
حاجات كده عجيبه ما باركزش اوي يا بنتي عشان ما اهيسش

ولا تروح ولا تيجى يا اختي خليكى هنا
ههههههههههههه

just waiting يقول...

لالالالالالالا حجرين على الشيشة ايه دا انتي قديمه قوي انا سمعت مرة اغنية بتقول احنا الي احنا مش عارفه ايه كدا ولا اتنحنحنا لينا في كل محكمه قضية وفي كل سجن بطانية لا عمرنا دخلنا السجون ولا شوفناها واسمنا محفور جواها
حاجه كدا مش عارفه اقول ايه
كنت هنسى اقولك حجرين على الشيشه نزلت كول تون كمان دي مشهورة قوي

لــــ زهــــــراء ــــولا يقول...

احلى ندى على ارق ياسمين

معذرة انى مش بادخل من فتره بس طبعا القلوب بتسلم

بصى يا قمر الذوق انحدر فى كل مكان ودلوقتى الشباب الهاى كلاس برضه ذوقهم بقى الحديد الذوق انعدم فى كل حاجه فى الاغانى واللبس والكلام والاسلوب فى التعامل
كنت من فتره بانسق حفله المهم لاقيت الناس اصحاب الحفله بتطلب اغانى عجيبه غريبه وحجرين ع الشيشه كانت منهم و ابو الليف وتتفجرى على الناس لما الاغانى دى اشتغلت والناس بدات الهيصه

ربنا يرحمنا بجد

زهــــــراء

لجين أبو الدهب يقول...

بيرقصوا بالمطاوى !!

انتى متأكدة ان دول بنات ..

والله زمنا ده مليان بلاوى بجد

إنا لله وإنا إليه راجعون ..:(

mrmr يقول...

الى اجمل ندى واحلى يا سمين
انا مش مندهشه
لان الزمن ده خلالالاص ما بقيش زمانا
راح الزمن الجميل وزمن سيد السيد عبد الجواد
ياريت نقول للزمان ارجع يا زمااااااان

يــوم جــديد يقول...

مطاوي ؟
بنات ؟؟
طعمية !!!
ايه يا حبيبتي دا
دي كوابيس يا ستي
ولا دا من الحر ولا ايه ؟

هو ايه اللي حصل في الدنيا وأنا مش موجودة ؟؟؟

بس الطالب الجامعي دا غلطان برضه ماهي دي مش أصول يعني ياكل طعمية بقى دا كلام
ساب ايه بقى للناس اللي واخدة ماجيستير دكتوراة لما حتة طالب لسه طالب جامعي ياكل طعمية

أنا مش عارفة احنا داخلين على ايه تاني أكتر من اللي فات
ربنا يرحمنا

هتشوفوا يقول...

انا من عشر سنين ماكنتش بحب الاغاني الشعبية يعني كان اخري حكيم وحسن الاسمر ربنا يرجعهولنا بالسلامة, اقل من كدة اقول ياي بيئة قوي

دلوقت بقى نزلت لتحت جداوبحبهم قوي

بس ماليش في الرقص بعبر عن نفسي بطرق تانية

اقولك رأيي, سيبي كل واحد يعمل اللي هو عايزه وبلاش تستغربي قوي كدة

richardCatheart يقول...

هههههههههههههههههههههههههه
والله انت مشكله يا ندى

فى ايه يابنتى خطوبه وهيصه والعيال عندها كبت وعايزه تخرجو هايرقصو على ايه ضمنى انا عن نفسى بهيص على الاغانى دى
بس سجاره بنى طبعا لاء علشان العيال
بس باقى الاغانى بهيص عليها ونتبسط شويه وخلاص
بس ساعه السمع السمع بجد مابسمعش غير ناس قليله اوى
كاظومه المفترى فيروز الجباره
كده ياعنى ممكن اغنيتين لخالتى اليسا

بس مابحبش صراحه لاام كلتوم ولا عبد الوهاب خااااااااااالص
عبد الحليم هما 3 اغانى طوال بس اللى بسمعمله

بس طبعا بتفق معاكى فى موضوع شكل الرقص فعلا الموضه بقيت البنات ترقص كانها ماسكه ماطوه او سكينه
والشباب بوسطهم وكل ما الشاب بعيد عننا ياختى وعن السامعين هز وسطه اكتر بقى ايه الواد التوب البوب

زمان اختلت مقايسه ماحد عارف البت من الواد

طيب ايه رايك انا فى الكولكشن بتاعى حاطه اغنيه جميله اوى لعمك عبد البسط حموده انا مش عارفينى ههههههههههه
ههههههههههههههههههههههههههههه

واغنيه اه يانى يا نى يانى دى كنا هاريهنا ايا الجزاير والكوره
الجزاير بتقول ايه
اه يانى يانى يانى يانى
مش هالعب كره تانى
ههههههههههههههههههههههه

تحياتى ويحيا الشعب

قلم رصاص يقول...

انا جبت من الاخر واقلعت عن سماع الاغاني

عندك مانع؟

بحسب

هههههههههه

وايه الشكل الجديد للمدونه دا؟
شكلك اشتغلتي في المخابرات
ومصر هي اللي بتدفع يا رأفت والحاجات دي

تقبلي مروري وتحيتي

بنت وولد يقول...

حلوووووووووه قوى طالب جامعى يتناول اقراص الطعميه

عيانا بيانا كده و متكسفش
ههههههههههههههههههههههه

دلوقتى بقى طالب اللجامعه يتناول قطع البانجو
يشم تذكره الهيرويين
عااااااااااااادى يعنى
انما طعميه
اهو ده اللى مش منكن ابدااااااااااا

shimaa elkholy يقول...

جاست ويتنج

عارفه يا اختي انها مشهوره والنبى بس تنفع اه نرقص عليها بمطاوي حضرتك انما مش نسمعها كاغنيه يعنى

وايه اتنحنحنا دي ما وصلتش عندي
هههههههههههههه

نورتي

shimaa elkholy يقول...

زهرا

اهلا يا جميل ولا يهمك انا عارفه انك مشغوله

ايوه ماهو انا الى غايظنى ان باقولك تلاقي البنت يا اختي ماشيه محزقه وملزقه وبتكلمك من ترتوفة مناخيرها وعامله فيها بتاعه وعربيه وكده وبعدين تلاقيها بتسمع حجرين على الشيشه
مسخره بجد

ماهو انا يا اختي كنت بانسق الحفله برضه دي كانت خطوبة اختي

كل شويه الاقي واحد من الشوباب جايبلي فلاشا ويقولي فى هنا اغنية سجاره بنى والنبى شغليها

الله يحرقكوا بقى قرفتوني هههههههههههه

نورتي يا جميل

shimaa elkholy يقول...

لجين ابو الدهب

ايوه والله بس مش فى اديهم مطاوي يعنى

بس بيرقصوا كأن فى اديهم مطاوي

بيمثلوا يعنى

واه ان لله وانا اليه راجعون فعلا

shimaa elkholy يقول...

مرمر

حياتي ربنا يخليكى ايه ده باتكثف كده

وبعدين سيد عبد الجواد ايه يا مرمر ازعل منك كده
مش هاضمك لجمعية المرأه المتوحشه بقى
هههههههههههه

shimaa elkholy يقول...

يوم جديد
هههههههههههههههههههههههه

اه والنبى يا اختي ده باينه تخريف حر ولا ايه

انتى فين يا بنتى وحشااااااني

هاتي بوسه

shimaa elkholy يقول...

هتشوفوا

بص يا طارق هو انا ما عنديش مانع الى عايز يسمع حاجه يسمعها

مافيش مشكله تسمعوها فى فرح ترقصوا عليها

انما ما تقنعنيش ان الى يغنى ويقول انا شارب سجاره بنى وحاسس ان دماغي بتاكلنى

ما ينفعش لغة المساطيل نعيش بيا يا فندم

طب نخليها للمساطيل مافيش مشكله هما حرين

انما مش هو ده الفن الى ممكن الواحد يشغله جمبه وهو بيشرب كوباية شاي فى البلكونه ويشم ريحة الفله ويبص للسما ويقول سبحانه بديع الكون
مش ممكن ابداااا تقنعنى ان ده فن

من حق كل واحد يسمع الى هو عايزه بس انا باقول يوم واحد بس فى الاسبوع اسمعوا حاجه تعد فن حقيقى مش هجص
ارتقاءا بالذوق العام بس

تحياتي ونورت

shimaa elkholy يقول...

قلب القطه
والله يا اختي انا ما عندي مانع ولا قلت لا

هما يرقصوا يهيصوا يتشقلبوا

بس كمان بلاش شغل المطاوي ده للبنات
وبلاش الولاد يرقصوا بوسطهم كما الحريم

وبلاش تكون دي الاغاني
الى الاغاني الطرب مش البتنجان المخلل ده

وايه ما بتحبيش ام كلثوم وعبد الوهاب هاقتلك يا قطه


الكولكشن بتاعك فيه انا مش عارفنى

ايه والنبى يا اختي الراجل ده بيقطع قلبي عارفاه
ههههههههههههههههه
ارحمنى يااااااااارب

shimaa elkholy يقول...

قلم رصاص

لا يا اخويا ما عنديش ده انت وفرت كهربا والله

والشكل الجديد لا ما كانش قصدي بس هى جت كده قلت زي بعضه خليك

ورافت مين وانت مين اصلا هههههههههههههههههههههههه

نورت يا سيد

shimaa elkholy يقول...

بنت وولد

اه مثلا يا اختي حد برضه يتناول الطعميه

الاقيش معاكي ربع قرش كابتشينوا والنبى

نورتي

الى ان يتم التعديل على الضمائر بقى
هههههههههههه

Che يقول...

انا كل اللى ضحكنى موضوع الطالب الجامعى اللى بياكل الطعميه ده ... تحسى برضه كان فيه حقد طبقى زمان :)
ايييييييييييييه ... دنيا ولا دايم الا وجه الله

غير معرف يقول...

ياني يايني ياني مش هعمل كده تاني
يانهار مدوحس
بدل مالعيال تحفظ قرأن واحاديث واداب الحياه

ده انا فاطمه بنتي بسم الله ماشاء الله 3 سنين ولو نسيت يوم اقولها دعاء النوم تقوله وتفكرني بيه

اه طبعا هي زي ابنك بتسمع في الافراح اللي في الشارع وخطوبه صحباتي والحنه والكلام ده
بس لما ندخل البيت وتردده لازم تتعاقب ويتمنع عنها العصير اللي بتحبه


طيب بما انك بقي فتحتي موضوع الالفاظ فأنا في حاجه محشوره في زوري وياريت تردي عليا بذمه

هي مش كلمه محن وكهن ( انا اسفه طبعا )ديه عيب برده
في ناس بتقولها ولما جيت اعترض اتقالي انها كلمه عاديه جدا وكلنا بنقولها ( ماعدا انا طبعا ولله الحمد )
وقال ايه بستشهدوا بمقطع في مسلسل ولا فيلم انها عادي اهه بتتقال
شوفتي الهنا اللي احنا فيه
ولما قولت طيب انا هقولها قدام فولانه ( علي اساس انها محترمه جدا وليها مكانه محترمه ) وهنشوف رد فعلها من ورايا وهتقول عليا بيئه وشرشوحه وغير محترمه
ولا هتعدي علي ودنها مرور الكرام
حسيت من الجلوس ( مجموعة الناس اللي قاعده )انه لا اوعي تعملي كده

بس بعيد عنك عدم الاعتراف بالخطأ مستكبرين يقولولي اه عندك حق
ايه رايك في الموقف ده بقي

shimaa elkholy يقول...

تشي

اه طبعا كانت الطبقيه اعمق من دلوقتي

لكن دلوقتي بقى مقنعه وحياتك

تحياتي لك ونورت

shimaa elkholy يقول...

الغير معرفه

تصدقي انا مش فاهمه انتى عايزه تقولي ايه

بصي هى كلمة كهن دي اعتقد ما فيهاش حاجه
انا ساعات باقولها كهن حريم كده يعنى

محن دي مش عارفه بس اعتقد هى نفس المعنى يعنى

ويعنى ايه تقولي قدم واحده والكلام ده مش فاهمه
مش عارفه
بس بصي انا عندي مبدأ
الخطا يظله خطأ قدام اي حد
مافيش حد مقياس

انما فى مقياس ثابت دايما لكل حاجه

بس خلاص

مش فاهمه مالها كهن يا بت

ما انا باقول للبت رحمه بنتى لما تستهبل عليا وتسوق ا لمكر
اقولها بلاش كهن يا خالتي والنبى
تضحك وهى فى وسط الشكوى والكهن
ههههههههههههههههه

Tamer Moghazy يقول...

تفتكري يوم واحد في الاسبوع كفاية لتنظيف كمية الـ(عك) طوااال ايام الاسبوع.؟؟

والله الواحد خايف من بكرة ومن الاجيال اللي جاية وعلى راي واحد صاحبي قالها زماااان (المنحنى في النااازل)..!!

غير معرف يقول...

اللي جوبتي عليه ده كويس جدا
ان الغلط غلط قدام اي حد
لكن لما اقيس قدام ناس معينه لفظ معين وقدام ناس تانيه اقول
هو ده الغلط بعينه
لازم يكون مبدأ الغلط واحد قدام اي حد واي شخص

متشكره ياقمر ياعسل
دايما ليكي عبارات منفرده بيها بتيجي في الجون بالصراحه

shimaa elkholy يقول...

تيمو

يا سيدى انا مش طماعه

يوم واحد بس يجربوا ياخدوا كوباية الشاي ويشربها فى البلكونه والهيدفون بيقول وصفوووولي الصبر لقيته خيال

مثلااااا يعنى ويهدى اعصابه ويسمع
مش يرقص هناك فرق

واه المنحنى فى النازل وما زال فى النازل
للاسف المريع يا فندم

shimaa elkholy يقول...

غير معرفه

مرسي يا بطه

يا خوفي منك فى اسألتك يا اختي

بس قوليلى بس من يقالك انك كهينه يا بت

مين قالهم الحقيقه
ههههههههههههههههههه

ياريتك ياا ختي كنتى كهينه كانت مشيت الليله كلها
هههههههههههههههههه

غير معرف يقول...

طيب خير انك عارفاني
بعدين مين يستجري يقولي كده
والله والله انا لو حد قالي كده لازم تكون وقفه جامده جدا بيني وبينها لدرجه ان ممكن كلامي معها ينقطع ويقتصر علي سلام عليكم



لا لا ميغوركيش اني بحب اوي واجتماعيه لكن شتيمه وقلة ادب بالجزمه لمؤخذه وفي حدود كمان في الكلام


يعني انا اعرف ناس صحابي جدا من سنين لكن عمري مقولتلها انتي عبيطه او انتي هبله
علشان بحترم النظام اللي ماشي عليه اللي قدامي
وبالتالي لازم اللي قدامي يحترم السيستم بتاعي
وكل شخصيه وليها نظمها وليها خطوط حمرا معايا لازم متتعدهاش
وكمان هي

وكله فوق خط الاحترام والحب علشان تستمر الصداقه

مش كده ولا ايــــــــه ياعسل ؟

shimaa elkholy يقول...

اه ماشي قشطه جدا

بس انا عادي اقولك يا عبيطه على فكره مافيش مشكله
ههههههههههههههههههههه

بس ماليش مزاج دلوقتي

طبعا كل واحد من حقه يحط لنفسه سيستم فى التعامل وباقي الناس كمان احرار يقبلوه بنظامه ولا ما يقبلهوش عادي


بس خدي بالك ممكن اوي واحد يحط لنفسه سيستم غير مقبول اجتماعيه تماما ويلاقي نفسه فى الاخر وحيد

من هنا لازم المعادله الصعبه

قشطه يا معلم

غير معرف يقول...

هي مش معادله صعبه ولا حاجه
كل الموضوع انك ازاي تجبري اللي قدامك انه يحترمك غصب عنه حتي لو كان قليل الادب ووصل لمرحلة القذاره

عمرك مقبلتي حد بيعمل معاكي كده

انه يكون هو اصلا انسان شتوم لكن ميقدرش يشتمك حتي ولو بهزار

هو ده كل الموضوع
وبصراحه انا علاقاتي كويسه جدا لحد دلوقتي ومفتكرش ان اي صداقه انقلبت الي اي شئ وحش بسبب تجاوز الشخص اللي قدامي معايا واني رافضه هذا التجاوز
وافتكر انك موافقاني في الحته ديه صح ؟

اما انتي فأنتي تقولي اللي انتي عايزه انا اتشرف ياقمر اني اعرف واحده زيك وزي سوتيته وزي موناليزا وزي زوجه شابه جدا وزي ناس كتير عرفتهم كويس وحبيتهم من غير مشوفهم واعتقد هما كمان حبوني وزي مبنقول من القلب للقلب رسول
مش كده ولا ايه

باحث عن حب يقول...

انحدار
الفكر
المصرى ينذر
بكارثه
حقيقيه
ربنا يسترها ياااااااااااااااارب

باحث عن حب يقول...

انحدار
الفكر
المصرى ينذر
بكارثه
حقيقيه
ربنا يسترها ياااااااااااااااارب

shimaa elkholy يقول...

غير معرفه

الحقيقه قابلت كتير
لدرجة انى اوقات كتير اكون حد اعرفه من فتره شخصيا

واتفاجيءانه بيكون فى جودي فقط محترم ولامم لسانه ما تعرفيش ليه برضه

مش عارفه مين قاله انى بابقى شايله مطوه

وعموما انا ما زلت شايفه معدلتي صح وما عنديش مانع اخسر اي حد ما يحترمهاش خصوصا فى موضوع الاخلاق وكده يعنى

منوره ياجميل واحنا الى متشرفينى بيكي

shimaa elkholy يقول...

محمود باحث عن الحب

الله يسترها معانا بقى هانعمل ايه

نورت