كتاب زوجي ما زال حبيبى .... ساره درويش

لسه جايه حالا حالا من حفل توقيع كتاب زوجي ما زال حبيبى  لساره درويش عندنا فى المنصوره فى مكتبة بوك اند بينز

حقيقى سعيده جدا جدا انى روحت واتعرفت على بنوتين عسولين موت ومن اول مره كده حسيت انى اعرفهم من زمان

منونه وساره درويش بجد  حبوبين اوي اوي والحقيقه قابلوني بحفاوه جامده اوي احرجتنى موت  والله

فى الحقيقه انا ما كنتش هاروح لانى ما كنتش اعرف اصلا

ولما عرفت قلت شكل كده ما حدش هناك يعرفنى هاروح  اعمل ايه بقى

بعدين منونه سابتلى رساله وقالتلى عايزه اشوفك وكده

قلت لا بقى نروح يا رجاله

وكمان ابراهيم قالي رايح

الحقيقه كنت فى تدريب الباسكت بتاع العيال والمفروض كنت هارجع البيت البس الحته الى على الحبل بقى واروح بس ما لحقتش الكابتن حبكت معاه يادبهم بربع ساعه سويدى زياده

قمت جبت العيال بقى ورحتلهم بترابي بقى عشان الحقهم الساعه كانت 8 

وكان هناك ابراهيم العدوي  كأنى اتكلم

ومحمد الغرباوي  رحلة بحث

ومحمد متولي بوكيه ورد

يارب اكون قايله الاسامي صح والنبى عشان انا دماغي وحشه اوي والله

وكان فى شباب من طنطا

وكان فى ناس تانيه اكيد كتير بس انا ما اعرفهمش بقى

اتكلمنا عن موضوع بنك الدم الى حكيت عنه لكم البوست الى فات

ومنونه قالت انها هاتنظم لقاء للتبرع بالدم فى طنطا  واديتها الوصايا العشر بقى عشان انا ليا سوابق

وعموما شايفه فى حماسه ربنا يكرمها يارب

حقيقى مبسوطه بكم  يا شباب وبحماسكم وروحكم الحلوه

وربنا يوفقك يا محمد ويثبت اقدامك وتستمر فى موضوع بنك الدم

و ابراهيم كان هايموت اعزمه على كشري بس انا ما رضيتش بقى قلتله ياعم روح نام بقى كشري ايه دلوقتي

الكتاب انا خدت نسخه بس له ما قريتهاش طبعا هاقراها واقولكم رايي ان شاء الله

يا ساره اتمنالك كل توفيق ونجاح ان شاء الله وسعيده انى شوفتك انتى ومنونه بجد

وبس خلاص

كان معاكم مراسلكم من المنصوره