الخميس، 22 يناير 2009

قلب ايمان ..... السادس




النهارده بقى الخميس وايمان وراها مليوووون حاجه عايزه تعملها وتفكر فيها بالاضافه للمسؤليات اليوميه من شغل والولاد والطبيخ .



الصبح قبل ما تنزل بصت لاشرف ا لى كان قاعد بيفطر وبيتفرج على الاخبار فى نفس الوقت وفكرت تسأله هو النهارده كام فى الشهر يا اشرف ؟؟؟





بس رجعت افتكرت كلام داليا لما قالتلها اوعى تحاولي تفكريه عايزين المفجأه تبقى صاااااادمه .



فرجعت فى كلامها






وقالت فى بالها خليها صادمه بقى احسن ولو انى شبه متأكده انه مش هايفتكر حتى لو سألته على التاريخ





وايمان نزلت بدري ربع ساعه واشرف كان منهمك فى طبق الفول والاخبار ما خدش باله نزلت ايمان وعدت الولاد على الحضانه .





وجنب الحضانه فى محل ورد ووصته يجهزلها صحبة ورد احمر وهاتعدي تاخدها وهى راجعه من الشغل .





ورجعت من الشغل وخدت الورد والولاد روحت جرييييييي .







ايمان بسرعه جهزت الاكل واشرف جه واتغدوا وناموا فكرت ايمان انها ما تنامش وتقوم تخلص اي حاجه واشرف نايم بس رجعت قالت فى بالها : لا انا هنام ساعه واحده عشان اقدر اكمل اليوم .










وايمان كانت بتوضب فى البيت كله وترتبه وبعدين :




أشرف : ايمااااااان فين الشاي بقى .


ايمان وهى جايبه الشاي : جاهز اهو . ايه انت مش خارج النهارده ؟؟؟



اشرف : اشمعن ؟!!



ايمان : ابدا عادي يعنى بسأل بس . كنت هاقولك تجيب شويه حاجات من السوبر ماركت .



اشرف : ماشي بس مش واخد حد من العياااااال .




ايمان بغيظ : ماااااشي ما قلتلكش خد حد هما يعنى هاقرصوك لو خدتهم . وبعدين اصلا هما عايزين يناموا مش هاقولك خد حد . اشرب الشاي يلا وقووووووم .



اشرف : طيب لما اسامه يرن عليا .




ايمان بغيظ اكبر وهى بتجز على سنانها : يعنى انت خارج اصلا اهوووو مااااااشي اشرب الشااااي .



ويخرج اشرف وايمان تجرييييييي تخلص الى وراها كله




وهى بتشتغل التليفون رن ردت وبتقول يارب ما يكون حد يعطلني :




ايمان : الو




داليا : الو يا فالحه هااااااا اخبارك ايه




ايمان : كويسه يا اختي . طلعان عينى شغل .




داليا وهى بتضحك : احسسسسسسسسن . المهم يعنى كله تمام ؟؟




ايمان : اه . بس قوليلى بقى الحاجات دي انتى بتعمليها طيب بتجيب معاكي نتيجه ؟؟؟




داليا بضحك وتريقه : لا انا قلت اجرب فيكى اشوف الحكايه دي شغاله ولا ايه




ايمان : لا بجد الموضوع ده متجرب ولا ايه .




داليا : اه متجرب بس فى حالات متستعصيه ما بيأثرش فيها وانتى شكلك مستعصيه قومي نامي يا بت .




ايمان وهى بتضحك جامد : طيب لما اشوف اخرتها معاكي .... بس بينى وبينك انا فرحانه وحاسه انى كان نفسي اعمل كده .




داليا : طب يلا بقى هاسيبك تكملي بكره بقى نعرف النتيجه يا متسعصيه هههههههههههه.




ايمان : طيب يلا بس ادعيلنا .








وتجري ايمان على المطبخ تزوق تارت الشيكولاته الى اشرف بيحبه والى هي عملته وحوالين القالب




شويه ورق ورد احمر جميل






وبعدين راحت عشت الولاد ونيمتهم واخدت شاور وبدأت الخطه الاساسيه




اخدت الورد وفرطت منه شويه وعملت بورق الورد الاحمر قلب كبييييييييره على السرير بتاعها وجهزت الشمعدنات بالشمع المعطر




وفى الحمام جهزت حمام سخن لاشرف بمايه فيها زيت عطري بريحة الورد اديتهولها داليا الاروبه .وشوية ورق ورد على وش الميه .




وشمعتين معطرين فى الحمام كمان .






وعملت سبت حلو اوي وفيه ورق كريشه مقطع على جليتر على ورق ورد برضه وشوية برفان كل ده فوق ازازتين برفان واحده حريمى وواحده رجالي مش غاليين




اوي لكن شيك وعلى ذوقها . وحطته فى ركن فى الانتريه .






وشويه حبشتكانات تانيه بقى ورقه جوا البجامه بتاعة اشرف مكتوب عليها باحبك . كده يعنى




مش كله من داليا كان في شويه حاجات من دماغ ايمان .... لا من قلبها كمان




وبعدين لبست القميص الجديد الروز _ لون التوينز الي اشرف شافها به اول م ره _ وفيه فيونكات كتير وكرنيش من تحت وشكله طفولي والى اشترته لما خرجت امبارح مع داليا بحجة تشتري حاجات للعيال .




وحطت ميك اب روز خفيف وعملت شعرها قطتين بالتوك الى شكلها ودان قطه اصلا .




المهم يعنى ان الليله دي راح فيها نص تحويشة ايمان لكام شهر عشان كانت ناويه تجيب موبايل جديد مليان حركات بس مش مشكله بقى الموبايل يتأجل بس ايمان واشرف اهم من كل حاجه




ووقفت قدام المرايه وابتسمت وقالت : كان له حق ينسى يقولي يا قطتى .




وبعدين طفت نور الشقه وفتحت بس نور خفيف فى الشقه كلها وجهزت موسيقى هاديه عارفه ان اشرف بيحبها وشوية معطر فى الهوا واول ما سمعت صوت العربيه ولعت الشمع كله وراحت استنت اشرف فى الانتريه .




اشرف دخل لقى الدنيا ضلمه والحكايه هاديه هز راسه بامتعاض شويه على ان الكل نام .


وبعدين شاف نور الشمع فى الانتريه ايمان ساعتها بقى جريت عليه فجأته .


طبعا اشرف كان مذهوووول


وقالها : ايه ده خضتينى يخرب عقلك . بس ايه ده ايه ده انت مين يا شاطره ؟؟




ايمان بدلع : أنا القطه ....قطتك يا قلبي .




اشرف : يااااااااااه انتى كنتى فين ما بتجيش ليه يا شيخه .........




يتبع ....














هناك 26 تعليقًا:

أحمد حسن البنا يقول...

ههههههههههه حلوة حكاية الحبشتكانات دى ....انتى مصيبة بجد تعليقاتك دمها خفيف وحلو قوى الجو اللى انتى عملتيه للسهرة دى بس اشرف يعنى طوبة اوى كده !!! كل كلامة فين الشاى وفين الفطار ورايح القهوة ؟؟؟ بجد ده راجل خنقة وحرام عليها تصبر عليه كان المفروض اول مايدخل من باب الشقة والنور مطفى كانت ضربته شومة فى دماغة وكومته هههههههههه جميل كلامك ورغيك يا ست الكل بس بلاش تكتبى زى مالناس عايزه اكتبى اللى انتى عايزاه انتى فى الحلقة دى بعدتى نهائيا عن الصراع الحقيقى جوا ايمان وخليتيها زوجة سعيدة وقطة وبتعمل جو للبيه اللى مدوبها وده مش وحش طبعا لانها بتحاول تحل مشكلتها لكن الصراع داخلها كان ممكن يبقى اكبر لو قابلت زميلها فى الشغل وكلمها كلمتين حلوين ولا لاحظ انها سعيدة او لمح لمناسبه حلوة وسالها عن اى شىء يحسسها باهتمامه ليها وسط نسيان اشرف ليها نهائى وبكده الصراع كان يبقى قوى جواها ويخلى من مجهودها فى مفاجاة اشرف مجهود خرافى ماتقدرش عليه واحدة فى حالتها الا اذا كانت فعلا بتحب جوزها ونفسها تكون سعيدة معاه حتى لو هو مش عايز .....وبعدين انا لو مكانك فى ختمة الحلقة ماكنتش ختمتها بالحالة الوردية دى لان الحلقة دى لونها بمبى بمبى وكانى شايف سعاد حسنى انا لو مكانك ( وانا بصراحة رخم جدا فى الافلات) كنت نكدت عليها بتصرفات اشرف فى الليله دى عشان ادخلها تانى يوم الصراع الحقيقى مع سى روميو فى الشغل يعنى لما تعمل ده كله واشرف يبقى كويس وتنبسط معاه انتى كده هتثبتى ان العيب كان فيها مش فى اشرف وتبوظ الليله انما لو طينتيها على دماغها بتصرفات غلط منها ومنه برضو يبقى المشكله مشتركة بينهم والصراع يولع ........بس بجد حلو الحشو اللى كتبتيه بين الحوار والا حبشتكانات دى ههههههههههههه موتتنى من الضحك وانا كنت منكد ....تحياتى يانجمة شغلك مميز وامور وكله خفة دم وبجد انتى في دماغك فكر حلو بس بلاش تتاثرى بتعليقاتنا وتكتبى زى مالدراما عايزة مش زى مالقارىء عايز .....تحياتى ولك خالص الود والاحترام يا ام مريم

عالم حبيب يقول...

الله يسعد أزواج المسلمين يارب العالمين

عاشـ بلا روح ـق يقول...

ههههههههه صبرني مش بقولك داليا دى شكلها هتودينا ورا الشمس وبعدين لما المدام تعملي فيها قطة أنا أعملها ايه .... فار مثلا هههههههههه
وبعدين ايه موضوع الحبشتكانات ده وال يعني ايمان ضحت بتحويشة العمر اللى كانت هتشتري بها موبايل ما كله من فلوس اشرف الغلبان ربنا يكون فى عون كل الرجالة لآنهم مساكين يا صبرنى بس أوعي تبلغي المدام .
تحياتي بجد على الموضوع الجميل ده وفى انتظار تكملة قصة القط والفار دى لما نشوف اخرتها مع الست داليا

الفراغ يقول...

لولا ان ست ايمان بتحب سى اشرف ماكانتش استحملت دا كله
بس كان نفسى تكملى القصه على بعضها
بلاش حركات التليفزيون دى وتعمليلنا 3 اجزاء وكلام من ده
بس بجد عيشتينا جو رومانسى جميل شكرا لقلمك

صبرني يارب يقول...

احمد حسن البنا

مش انا قلتلك قبل كده مش هدفي اعمل حبكه دراميه ولا صراعات ولا كلام من ده

انا هدفي هو قلب ايمان واشرف كمان وحياتهم ودي النقطه الى انا عايزه اركز عليها

تحياتي لك ومتشكره اوي على الاطراء الى يمكن اكتر من حقي

صبرني يارب يقول...

بيربس

الله هو انا هاعمل كل حاجه ما تكملوا انتوا بقى

نورت يا استاذنا

صبرني يارب يقول...

عالم حبيب

امين يارب العالمين نورت يا فندم

صبرني يارب يقول...

عاشق بلا روح

يا سلام كده هاتوديكم ورا الشمس انا قلت من زمااااان هاتلي تليفون المدام عشان اعرفها على داليا ههههههههههههه

او كفايه تعرفني وانا اهدي النفوس واعزمها تشرب شاي معانا فى مصراوي
ههههههههههههههههههه

وبعدين من فلوسه ايه يا سيدى لا مش من فلوسه طبعا هى هنا بتشتغل ايه ده انت مش متابع ولا ايه

نورت يا عاشق

صبرني يارب يقول...

الفراغ

والله ما حركات تلفزيون بس عنى ينفع اكتب بوست من عشرين صفحه ده المدونين يهدروا دمي ههههههههههههههه

نورتي يا جميل

لماضة يقول...

تصدقي كنت هعيط بجد
حرام عليكي يا صبرني
ايه يابنتي ده
طيب مش تراعي قلوب العذارى اللي زيي لما يقروا الكلام ده
هههههههههه
وبتقوليلي اقريها
اديني قريت الاجزاء كلها
هاتيلي بقى علبة كلينكس امسح دموعي وباكوين شوكولاته

صبرني يارب يقول...

لماضه حياااااااتي

كلينكس ايه بقى

امال هاتعملي ايه فى الي جااااااااي

هههههههههههههه

اوعى تكوني بتعيطى عشان الشاشه وجعت عينك

نورتي يا جميل

mony يقول...

شوفتي

دا مكانش لاقيها بأه علشان يتكلم معاها اصلا

و ماصدق لقاها


ربنا يتمم بخير بأه


لو داها جرعة ولو صغيرة هتعرف تصد اخينا اللي في الشغل كويس اوي



مستنيين الباقي بأه

صبرني يارب يقول...

موني

هو هنا غلطان بقدر غلطها

هما الاثنين بعدوا عن بعض

كان مممكن هو يطلب منها ده بشكل حلو ولطيف وجميل

كيــــــــــــارا يقول...

ايه دا ياصبصبتي

هو في قصه بتتكتب من ورايا

عاااااااااااااااااا

لا انا هروح اقرا الاجزاء اللي فاتت عشان اعرف اتابع كووووويس

سلامو مؤقتو

صبرني يارب يقول...

اه يا اختي وانتى مستخبيه ولا مش عارفه طفشانه ولا ايه كده

هاقططططططعك

Gannah يقول...

السلام عليكم
بجد ضحكت جدااا لانى خايفة عليها من رد الفعل بعد كل المجهود اللى هى عملته
بجد البوست دمه خفيف قوى
ربنا يستر من الباقى
تحياتى

صبرني يارب يقول...

جنه

حبيبتى نورتي والله

خايفه عليها ليه خافي عليه هو بقى هههههههههههههههه

ربنا يستر

نورتي يا جميل

فشكووول يقول...

كان لى هنا تعليق .. راح فين
على العموم اشكرك للزياره وتحياتى

صبرني يارب يقول...

استاذنا لا والله ما حصلش ما علقتش عندي على البوست ده

يمكن البوست الى قبله

والعفو بتشكرني على ايه

شمس النهار يقول...

يابنتي بطلي موضوع القطه دي
الموضوع كده خد شكل لطيف لما نشوف
سي اطفش ده هيعمل ايه
هيتعدل ويساعدها والا لا
طبعا شكرا علي سؤالك ياست الكل
بس كنت مشغوله بالقبيله والموضيع

صبرني يارب يقول...

شموسه يا حبيبتى

نورتي يا جميل

ويارب دايما مشغوله بهم ومنورينك

وبالنسبه للقطه هي جت كده بقى ههههههههههههههههههههه

بس اشرف لسه بدري على ما يتعدل وهى كمان لازم تتعدل

حنين القلب يقول...

هههههههههههههههههههههههههههه

عسل يا صبرنى
بجد جميله اوى
وحلوة اوى الحكايه دى انا هجربها مع اشروووووف بس وربنا لو ضربنى على الجبس انتى حرة

وبعدين بقى
كملى عايزة اعرف الاخر

بت يا صبرنى وحشتينى والله اوى
موووووووووه دى لمريوم ورحومه

عبده الرايق يقول...

ايه ده ؟؟؟؟
كل الحلقات دى وانا مش متابع ؟
بسم الله ماشاء الله
انا مش هاقول اى رأى الا بعد ما اقراء كل الاجزاء
الف تحيه ليكى

عبده الرايق يقول...

اه
قبل ما انسى
بوست صنيه البرارص نازل انهارده
الساعه 10

صبرني يارب يقول...

حنين يا قلبي

اه صحيح ده اشروووف هههههههههههههههههه تصوري ما خدتش بالي

هههههههههههههههه يلا يا ستى بالشفا لا ما تخافيش مافيش ضرب

وبعدين ورنبا انتى كمان وحشاني ورنتلك من كام يوم واستنيتك وانتى نفضتليل يا لولو

صبرني يارب يقول...

ايه ده ؟؟؟

الرايق عندنا ؟؟؟

طب استنى افرك عنيه

ايه الشرف ده والله انا بجد فرحانه خالص

اه شوفت السابع كمان نزل وانت منفضلي خالص

هاستنى رايك جداااااااااااااا

وتحياتي لك ونووووووورت

وشكرا على التنبيه على البوست بتاعي ربنا يكرمك