الخميس، 12 مارس 2009

لوحة حب


السلام عليكم


من فتره من الزمان مش فاكره اد ايه اتناقشت انا واحد الاخوه المحترمين والى كان بيكتب شعر انه الشاعر او الاديب المحترف او المتمكن من ادواته يقدر يكتب باحساس غيره


يعنى مش ضروري يكون الكاتب هو بطل كل روياته . او يكون حتى احد افرادها .


ولا ان الشاعر مثلا يكتب قصيده عن خيانة الحبيب يكون حبيبه خانه


يعنى اقصد ان ممكن الشخص يتخيل حياه او مشهد او قصه ويتكلم من خلاله


المهم انه يقدر يحس باحساس الموقف ده ويجسده كمان لو كان حقيقى



وبعدها كتبت حاجه اثباتا للكلام ده وكان البطل فيها او الراوي رجل


ومش عارفه ان كنت فعلا قدرت اثبت وجهة نظري ولا لاء


انا نزلته قبل كده هنا فى المدونه بس كنت لسه مبتدأه تدوين ومش عارفه اتشال ازاي وما نزلتوش تاني برضه مش فاكره ايه الى حصل


المهم انا جبتهولكم تقروه وتقولولي رايكم فى وجهة نظري اولا

ورايكم فى الى انا كاتباه طبعا


وانا كنت مسمياها


لوحة حب



كانت طفله .


نعم كنت اذكرها كذلك ورأيتها ثانية ولكن ما هذا؟


فلم تعد طفله انها فتاه جميله يفوح منها عبير انثوي جذاب ,


فحدثتها بعينى ماهذا يا صغيرتى ؟ فأجابت بقلبها انه فعل صائغ الصبايا.


وتحدثت الي ....


ولكن ما هذا ما زال هناك طفله!!!


فى عينيها فى ابتسامتها فى ضحكاتها فى صدقها


.مرت ايام وايام وكنت افكر بها وكلما رأيتها تعجبت من ذلك التركيب الجميل ويزداد انجذابي لها,


وتحينت الفرص لاتحدث اليها وان أسمع حديثها الممتع واتعرف كيف صاغت الدنيا لها افكارها وحياتها.


وهنا اسرتنى........


كيف اسرتنى؟ ولما اسرتنى؟ لاادري!!


ولكنى بالفعل اعرف, انها جميله, انها انثى جذابه ورقيقه وحانيه.


ولكن الطفلة التى تطل فى عينيها تزيدها بريقا وتطفي صدقا على ابتسامتها.

هى ذات حكمه.

نعم رغم غضاضتها لها عقل مميز الملامح والافكار لا تملك الا ان تحترمه.

هكذا اسرتنى .....فاسرتها .


نعم اسرتها .


اسرتها بحب عظيم فاض علي جوانبها وملأ حياتها وحياتي وقلبي.


قلبي الذى ارحته فى احضان كفيها .

فهى تملكه كما ملكت انا قلبها واصبحت لي واصبحت لها .

ومن لا يرى الحب او يلحظه فانه يراه فى اعيننا ولو بيننا الف شخص ويسمعه يرقص على دقات قلوبنا.


وهاهي صغيرتى ارقبها تزداد عمرا وتزداد نضجا وعقلا وفى عينى تزاد جمالا وتألقا وما زالت تطل من عينيها الطفله الضاحكه الصادقه.

وما زالت تملأ حياتى وقلبى وانا لها كذلك .

فكل يوم ارفع رأسي الى الله احمده واشكره وارى رضاه بقلبي


سبحانه هداني الى ما هديت وما هديت نفسي


فيا طالبى الحب فى كل مكان وزمان فلتسترضوا الله فان الحب هدى من الله فاسألوه اياه سبحانه جل علاه.


تمت

**********************************


يلا قلولي رايكم بقى

********************************************


وبالمناسبه

بالنسبه للناس المهتمين والمحبين للادب

انا بادعوكم لزيارة الاخ




صاحب مدونتين






شايفه انه بيكتب كلام كويس ولانه تقريبا مدون جديد ما باشوفش فيكم حد هناك

قلت نبعتكم تستمعوا معنا

هناك 50 تعليقًا:

عاشقه وغلبانه يقول...

انا جيييييييييييت
نورت البيت

عاشقه وغلبانه يقول...

بصي طالما حسيتي الموقف بجد يبقي لازم الاسلوب يوصل للي يقرا ويحاول يحس من غير مايحط في باله مين كتب


اعرف شعرا كتير بينسجوا قصه خياليه ويعيشوها في تفكيرهم ويكتبوا عليها اشعار


اسلوبك جميل اوي

وانتي وحشاني كتير

صبرني يارب يقول...

عاشقه وغلبانه

حياتي وانتى كمان واحشاني


اها انا قصدي هنا ان ممكن يكون الاحساس صادق وواصل للقاريء من غير ما يكون حقيقى

المهم مقدرة الكاتب على التخيل ورسم الصوره صح

تحياتي ليكى ياجميل ونورتي

احساس طفلة محبة للرومانسية بس واقعية يقول...

انا رأيي ان انتى ممكن تكتبى اى حاجة بس اسلوب كتابتك بيختلف لو كنتى عشتى الوقف او شفتية على الاقل او مر بحد تعرفية
او حد حكالك عنة او كنتى بتقرى وجاتلك فكرة وحستيها اوى او لقتى انها بتشبهك

فى لوحة الحب اللى انتى كتبتها رغم انها من رجل الا انى شايفة فيها رأي امرأة بعينن رجل فيها احساس انثوى بالطفولة والرقة يحكى عنها رجل

بس بجد جميلة يا صبرنى
احساسك عالى
تقبلى مرورى

قوس قزح يقول...

الكاتب الشاطر بيعيش فى جو القصة و يقدر يوصف بالظبط مشاعرها و تفاصيلها من غير ما يكون مر بها
لكن اللى بيحكى واقعة مرت به و عاشها .. ده ممكن اى حد يعمله

القصة اللى انتى كاتبها احساسيها هادية و رقيقة و جميل هدفها كمان

تحياتى
و هروح ازور البنا :)

mahasen saber يقول...

صبرنى الاحساس نعمه يا حبيبتى ونعمه عظيمه كمان

وبالتالى اليى هيحسحاجه او يستشعرها او يحط نفسه فى قالب الاحساسده حتى ولو مش عايش فيه طبيعى طبيبعى طبيعىهيبدع يا صبرنى

ناهيكى انك اديبه بالفطره ياجميله

mahasen saber يقول...

انا عملت زى ما بتقوليلى وبطلت ااقول مش احساسى مش انا مش انا

يعنى كتبت المبررات ومسحتها مفيش اى داعى اكتب مبررات
بس ساعات حاجات كتير ببقى كاتباها مسبقا باحاسيس مسبقه وساعات حاجات بختلق احاسيسها جوايا وساعات كده وساعات كده
فاهمه حاجه بئه

صباح الفل والخير وكل حاجه حلوه وبوسيلى اولادك ربنا يباركلك فيهم

من غير عنـــوان يقول...

اسلوب أدبي جميل

أمنياتي

بنت الغربة يقول...

حبيبتى ياصبرنى
ايه الكلااااام الجمييل قوى ده...؟؟
انتى اللى كتبتى ده صحيح..؟؟
انتى رومانسيه قوى ياجمييل...
بس تفتكرى فى رااجل بيقول الكلام ده لواحده فعلا...؟؟؟
جايز ...بس انتى لازم تكتبى تانى خواطر واشعار كده ..لأن اسلوبك حلو قوى بصراحه..
وظريف ومافيهوش كلام مكلكع ...احيانا انا باقرا اشعار فيها كلام عايز يترجم عربى...مع انه عربى ..؟؟؟
اصل اختك ضعيفه جدا فى العربى ...
تحياتى ياقمر

عمرو يقول...

يا أختنا الفاضله مهم جدا اٍن الشاعر أو الكاتب يكون مر بتجربه خاصه و شخصيه فيكتب فيها بصدق مقنع لنفسه و للقارىء
و ممكن برضو يكتب من وحى ما سمع من تجارب الآخرين أو من وحى اٍحساسه الشخصى بموقف ما تفاعل معه
أغلب الظن فيما كتبتى أنك بتتحدثى عن نفسك شخصيا و كأنك تنظرين فى مرآه أو هكذا أفترض لأنه مش من المعقول أن تتحدث أنثى فى وصف أنثى أخرى بهذا الوصف الدقيق لمشاعر داخليه لا يصل اٍليها اٍلا صاحبها
و فعلا يا أختنا بداخل كل منا طفل لا تنجح أبدا مؤثرات الزمن فى اٍخفاءه و لا فى وأده .. صدقتى و الله
بس على فكره فلتسرضوا بتنكتب كده : فلتسترضوا
ورينا نماذج تانيه كده من كتاباتك و نكون شاكرين

reem يقول...

reem يقول...
صباح الخير ياصبرنى ياقمر
انا بشوف الاديب او الشاعر دا انسان حساس جدا بطبعه وعشان كدا ممكن يكتب عن تجارب ناس غيره باحساس عالى جدا ومش ضرورى يكون عاشها لانه بمشاعره الفياضة واحساسيه بيقدر يتقمص دور الشخص اللى عاش التجربة فعلا وبالتالى بيكتب بلسانه واحساسه
دا رأيي طبعا ومش عارفه اذا كان صح ولا غلط
وبجد اسلوبك جميل وكلماتك حساسة ورومانسية وهو فعلا انا بشوف ان الانثى اللى لسا فيها جانب طفولى بتكون ذات جاذبية خاصةودا على فكره مش له علاقة بالسن اوى اد ماهو له علاقة بالقلب
وحشانى جدا ياصبرنى

الشموع البيضاء يقول...

انا بوافق الراى ده جدااا
لان الشاعر او الانسان الحساس ممكن من قصة او موقف اتحكاله او مشهد شافه يفكر فيه ويحس بيه لدرجة انه يكتب ويعبر عن ابطاله ويتكلم بلسانهم وده الفن او الادب مش بالضروره يكتب عن شخصيته دايما ولا كده اصبحت مذكرات شخصيه لاديب لازم يكتب بلسان كل المواقف ويناقشها
اسلوبك جميل ياصبرنى كملى منتظرين

صبرني يارب يقول...

احساس طفله

اه طبعا مؤكد انا باكتب بقلم امرأه

لكن برضه متأكده انه فى رجل ممكن يحس بطفولة ورقة انثاه مش خشب هما يعنى هههههههههههههه

نورتي يا جميل

صبرني يارب يقول...

قوس قزح

حيااااااااتي وحشاني يا كوتي والله انت يا بت عامله اواي على طول

المهم فعلا ده رايي الى يسرد حاجه حصلتله ده اي حد يعمله

انما الى يحاول يجسد موقف ما عاشوش وينجح فيه ده الى مش ممكن اي حد يعمله

لكن السؤال هل انا فعلا نجحت فى ده ولا فاشله كالعاده ؟؟

ههههههههههههه

نورتي يا قمر

صبرني يارب يقول...

من غير عنوان


ابروز الرد بتاعك يا فندم ؟

نورت

صبرني يارب يقول...

محاسن صابر

انا كمان ما باحبش تبرير الكتابات لانها بجد بتخنق

يعنى انا على فكره كاتبه حاجات كتير واكتر منها نفسي اكتبه لكن عارفه ان الناس هايقرفوني

وايام القصه انا نوهت بس اكتر من مره عن ان القصه من خيالي لان كان هبل بيحصل وكل واحد فاكر ان مراته هى بطلة القصه وان فى محمود معاها فى الشغل
ههههههههههههههههههه

فقلت لا الا خراب البيوت يا اخواتي

نورتي يا جميل وميرسي على الكلام الحلو الكتير عليا

صبرني يارب يقول...

بنت الغربه

ههههههههههههههههههههههه

عسل والله تعرفي بقى انا احب اقرا الكلام المكلكع ده
اه والله مع انى برضه فى العربي يعنى بافك الخط خارجه من ساته كده هههههههههههههههه


بس انا بافهمه والله وباحبه

وبجد انا رومانسيه ؟
تصدقي ما اعرفش

بس على فكره الى انا كاتباه هو مش بيقوله لها
ده بيقوله عنها
وكمان يعنى بعد ما بقوا طاعنين فى السن
مش بيقوله لها يعنى هما بيبلعوا لسانهم يا حلوه بعد الجواز هههههههههههههههههههههههه

تحياتي يا قمر وهافكر اكتب بس انا باتكثف (مش بيمثل انه مكسوف )

هههههههههههههه

نورتي يا قمر

صبرني يارب يقول...

استاذ عمرو

ههههههههههههههههه نفسي ؟؟

يجوز برضه

لكن انا يمكن وصفت مثال لطيف للست كما يجب ان تكون من وجهة نظري

انثى جذابه وذات عقل حكيم ولها قلب طفله من البراءه والنقاء

بس

انا معاك ان المفروض الكاتب يجسد تجاربه لكن كمان ممكن يجسد تجارب الاخرين
وجايز كمان يعمل كوكتيل من ده ويألف تجربه جديده

يا اما يتمنى حدوثها
او يعتقد فى وجودها اصلا

اوي تحت اي مسمى تاني

وفلتسترضوا حاضر هاصلحها ده خطأ مطبعي بقى السماح

مش املائي لا انا خارجه من ساته ومتنوره يعنى
ههههههههههههههههههههههه

تحياتي لك يا استاذنا ونورت

صبرني يارب يقول...

ريييييييم

تمام انا باعتقد كده برضه بس انا مش اديبه ولا عندي مشاعر حساحيس هههههههههههههههه

انا مجرد باتحدث عن الفكره بس

وبرضه ايه حكاية رومانسيه دي ؟؟؟

اظاهر انا هاكتشف فى نفسي حاجات جديده ههههههههههههههههههههههههه

وانتى كمان يا جميل وحشاني

بس اعترفي بقى انتى مين هههههههههههههههههههههه


نورتي قمر

صبرني يارب يقول...

الشموع البيضاء

تحياتي ليكى ونورتي

اكمل ايه ؟؟

لا ما تاخدوش عليها دي اساسا مكتوبه من زمااااااان يعنى حوالي اربع سنين كده

نورتي يا قمر

صبرني يارب يقول...

احمد حسن البنا

يا لهووووووووي انا برضه الى رغايه

اولا مبرووووووووك على النشر للقصص

وانا قريت ذكريات للبيع لسه التاكسي

معلش عندي انفلونزا والقرايه من الشاشه بقى دموع للركب هههههههههههههههه


وبالنسبه للكلام عن قصتي

اه كان فعلا المفروض اكتبها الاول حتى واخلي التنويه تحت


الا انى فى موضوع صدق المشاعر ده مش عارفه برضه هذا ما رايته

ممكن اجرب اكتب تاني وابقى اشوف رايكم ايه

والتنويه اقل واجب يا فندم انت بتكتب كويس فعلا

نوووووووووورت

شمس النهار يقول...

جميله اوي ياصبرني
يعني كل الكتاب والشعراء دول عاشوا كل التجارب اللي كتبوها
دي تبقا جمعيه تعاونيه مش قلوب ومشاعر
المهم
اسلوبك لطيف

صبرني يارب يقول...

شموسه

حلوه دي يا شموسه

تحياتي ليكى ونورتي

حبيبه سى السيد يقول...

مبتدئة اية بقى انتى اكيد كنتى بتكتبى قبل التدوين

شعرك من النوع المريح اللى فية الكلام سهل وسلسل يعنى بقرأة ومش محتاجة مدرس لغة عربية يفسر
ويدينى معانى للكلمات

كلمى ورينا الفن اللى جواكى زى ما ورتينا الرغى

hasona يقول...

السلام عليكم

برأئي أن الكاتب أو الشاعر
بيكون أحساسه بتجربتها أقوي وأفضل
وملم بكل الاحداث ويعبر عن كل الجوانب اللي عايشها
لكن عندما يتخيل موقف أو يحكي له
فهو يعبر عنه من خلال رؤية معينة ومن خلال تخيل قد يسير به في اتجاه معين دون الاخر

والكاتب المتمكن يستطيع أن يعبر بالقارئ الي الاحساس بالصدق
ويقلل الفرق بين التجربة الشخصية والتخيل
،،،،،
أم عن لوحة حب أو حالة حب

كلماتك عبرت عن معني الأسر
والاسير الذي يعشق الاسر
ولا يريد أن يفتدي نفسه


تحياتي

ستيته حسب الله الحمش يقول...

الله
حاجة غريبة جدا
طيب ازاي بالصلى ع النبي فعلا عبرتي عن حب الحبيب لمحبوبه وكأنك رجل رومانسي

لكل من قال لا يوجد رجل يرسم مثل هذه اللوحة

لا والله فيه بس هم نادرين زي اي مخلوق بنفسجي لزج منقرض

جميلة قوي ياصبرني كأني اقرأ لأبراهيم صاحب مدونة كأني اتكلم

ازاي يا أروبة جبتي مشاعير المحب الدكر؟ اعترفي يابتاعة الفلسفة انتي

بحبك

صبرني يارب يقول...

حسونه

الله يكرمك وتمام زي ما حضرتك قلت كده ده برضه رايي

وحضرتك شرفتنا

صبرني يارب يقول...

زوجه عنيده

انا كنت باكتب اه بس ماليش فى الشعر والادب والله

كنت باكتب فى منتديات ياما راح مني شغل فيها
بس عزائي انى دايما باحتسب اي حاجه لله ورسوله واتمنى يفضل مواضيعى مقروءه


ومش عارفه هاكتب تاني حاجه زي كده ولا لا

وشعر ايه ؟ هو ده شعر يا ولاد
بتهيئلي لا يندرج تحت بند الشعر

ولا ايه يا جودعان انا ما بافهمش فى المواضيع دي
تحياتي يا جميل ونورتي

صبرني يارب يقول...

ستيته حياتي


ايه ده بجد حلو ؟؟

تفتكري انا بعبرت صح هههههههههههههههههههه

وبعدين يعنى لما كل الرجاله شايفين نفسهم ما يعرفوش يبعبروا حلو كده ساكتين على نفسهم ليه يا اختي

ويرجعوا يقلولك الستات بيخنشروا بعد الجواز وبينشفواويبقوا زي طب الملوخيه البايته ؟؟؟

وما اعرفش انا الاخ ابراهيم بس ندور عليه عندك بقى ونوصله

والنبى يا ابلتي هى الهام الى جاتلي مره وخلتنى كتبت البتاع ده
هههههههههههههههههه

نورتي يا جميل

د. ياسر عمر عبد الفتاح يقول...

برافوووووووو
كلامك فى الأول صح على فكرة
وممكن الشاعر المتمكن يكتب على لسان حد تانى وعن مشاعر معشهاش بطريقة مباشرة

لكن تبقى التجارب الذاتية ذات صوت أعلى وأقوى ومشاعر أوضح وأنقى

حنعيش يعنى حنعيش يقول...

انا تحت امرك يافندم انا مش بس دكتور بيطرى انا معايا دكتوراة فى العصافير

صبرني يارب يقول...

د. ياسر

الله يكرمك يارب

تمام كلامك يا فندم وده رايي برضه

وحضرتك نورتنا

صبرني يارب يقول...

حنعيش يعنى هانعيش

هههههههههههههههههههه

يا فندم ربنا يكرمك يارب هابقى احكيلك بقى على عصافيري سابقا الى قررت استغنى عنهم لحد ما اربي العيال وبعدين ابقى اربي عصافير تاني


نورتنا

ذو الوجه المبتسم يقول...

السلام عليكم
البوست جميل ومعبر ومفيد جدا
وكمان اسلوبك رائع
لانك وضحتى امور كتير قد تكون غائبة عن البعض
الشاعر او الفنان بطبيعته بيحب يعيش الموقف وليس بالضرورة انه يكون حصل له
بس المشكلة او المصيبة بقي يا ستى ايه ؟؟؟؟
انه يكون متجوز ويكتب عن الحب باسم واحدة غير مراته
وقتها هتبقى جريمة ههههههههههه
عاوزك تنصحى الستات المتزوجات من فنانيين بنصيحة حلوة ؟ تقولى لهم ايه ؟
بس اوعى تقولى لهم نصيحة تخليهم يموتونا هههههههههههه
تقبلى تحياتى

صبرني يارب يقول...

ذو الوجه المبتسم


لا يا فندم ماهو لو جوزي بيكتب كده وباسم واحده تانيه

هايتعرض لاستجواب سريع وقاااااااااسي

وبعدين يا سيدى الفاضل ماهو انا عماله اقري فيهم مش بيفهموا كلهم

اقولهم يا حريم لازم تتعاملوا مع اجوازتكم بسياسة اللازقه الانجليزى وما يسبوهمش اطلاقا بحيث لا مجال للشك هو عارف يتنفس اصلا يا عمنا
ههههههههههههههههههه


تحياتي لحضرتك ونورت

جنّي يقول...

السلام عليكم

الموضوع أي موضوع هو فكرة وعناصر وصياغة وهدف سواء الكاتب عايشها بنفسه سابقا او الآن أو غيره عايشها فصاغها هو .. المهم الحرفية في الكتابة والوصول للهدف ..

وارى انكي كتبتيها في بداية التدوين كما ذكرتي فتستحقين جيد جدا ..

استمعت لبرنامج اذاعي قديم كانت تقدمه نجاة الصغيرة .. نعم المطربة مع كامل الشناوي .. نعم الشاعر .. ومعروف انه كان يكن لها الحب ويكتب قصائده لها ..فسألته هل ما يكتب من قصائد حب يعيشها الآن فقال لها ليس بالضرورة فقد يكون عايشها فى السابق او يمر بها الآن او لا يكون هناك طرف آخر كتب له القصيدة ..

قرأت تعليق احمد حسن البنا وقال ان الكاتب نوعان من وجهة نظره .. اتمنى ان يكتب لنا وجهة النظر العلمية او الأدبية ..

شكرا وتحيتي

صبرني يارب يقول...

جني

اهلا استاذنا

متشكره اوي على الجيد جدا الى كتيره عليا

بس دي مش فى بداية التدوين دي ما قبل التدوين بسنين

والموضوع اه ممكن نصوغه بحرفيه

الا انى مع الراي القائل بانه من خاص التجربه يعبر عنها اصدق

لكن ده ما يمنعش ان حرفية الكاتب قد تقربه من الحدث اكثر مما نتخيل

واحمد حسن البنا نروح نجبهولك يا فندم لحد عندك

ولو انى ما فهمتش السؤال الموجه له

صوت من مصر يقول...

تعبير مؤثؤ للحاله العامه

صبرني يارب يقول...

وات ؟؟؟؟

يعنى ايه ده يا استاذنا

حاسوباتيه يقول...

حلو قوي قوي بجد الكلام جابلي تفاؤل كنت محتاجاه بجد شكرا ليكي وتسلم ايدك

صيدلانيه طالعه نازله يقول...

ياريت كل انسان يحس بقيمه الحب اللى معاه لانه نعمه و لازم يصونهاو يرعاها عشان تكبر و تملا عليه الدنيا
بوست جميل قوى و يخلى الواحد اعصابه تروق و تهدا

صبرني يارب يقول...

حاسوباتيه

عنيه يا جميل تعالي وانا اقولك من ده كتير

هو ما بيقولش ولا ايه ؟؟ قولي بس وانا ابعتله جميع اعضاء الجمعيه هههههههههههههههه

نورتي يا قمر

صبرني يارب يقول...

صيدلانيه

للاسف ما بنحسش بالنعمه الا لو اتحرمنا منها

يظهر ان صوت نجاة عمل شغل مش البوست بقى ههههههههه

نورتي يا قمر وشكرا لك

فشكووول يقول...

ازيك يا صبرنى .. اشكرك على الزياره .. دائما سباقه بالخير
انت كتبت بصيغة الرجل ولو ان الواحد مش عارف انك انثى كان افتكر فعلا اللى بيكتب رجل .. بس فيه احاسيس للرجل صعب احساسن الانثى به كما هناك احاسيس للانثى صعب احساس الرجل به لانه لم يدخل التجربه او لا يستوعبها لانه لم يحس بها مسبقا .. وكفايه

تحياتى يا صبرنى

Sweet Violet يقول...

انا جه انا جه انا جه (:

وحشاااااااااااااااانى ياقمر

انا دايما بقول كلامك ده ان الواحد لما يكتب مش شرط يكون نابع من تجربه شخصيه حتى لو مش محترف

اما عن لوحه حب لما قريت التنويه ان البطل رجل قريته على الاساس ده بس حسيت ان ممكن يكون البطل هنا امرأة بردو مش عارفه ليه (:

بس الاحساس فيها حلو بجد ماشاء الله عليك

صبرني يارب يقول...

فشكول

ربنا يكرمك يا استاذنا واكيد طبعا مش هايبقى ميه فى الميه

وتحياتي لحضرتك ونورت

صبرني يارب يقول...

سويت فيوليت

يا كوتي منوره

طيب يعنى ازاي ست هههههههههههههههههههههههه

كده يبقى انا فشلت فشل زريع
هههههههههههههههههههههه

نورتي يا جميل

تامر علي يقول...

انا موافق تماماً على رأيك المتمكن من أدواته ممكن يعمل (ان شا الله شقلباط في الكتابه :) )

ومتقوليلش فين المدونه ... خلاص نزلت أي خدمه :)

صبرني يارب يقول...

تامر علي


اها المتمكن بقى اذا كان انا الى كنت وقتها يادوب باكتب اسمي كتبت اهو يعنى كلام يجى منه
هههههههههههههههههههه


والمدونه نزلت ايوه بتاعة الطبخ كنت مفتقداها يا اخويا

بس التانيه كمان نزلت ولا ايه الظرووووووف

عموما مووووووشكرين يا اخ تامر ونخدمك فى اي مدونه

وعلمك علمك مش بس الستات الى اجوازهم بيقفلولهم مدوناتهم

لا لا والرجاله برضه بيجيلهم يوم وستاتهم تقفلهم مدوناتهم فا ما تخافش يا اخويا هاجيب اعضاء الجمعيه برضه ونيجى نقف جنبك يعنى عشان انت قمت بالواجب معانا

نورت يا استاذنا

حبيبه سى السيد يقول...

انا كنت عايزة اقولك ان كلامك عامل زى النثر

انا كنت بحب النثر اكتر من الشعر على فكرة

تحياتى