الجوااااز

السلام عليكم

أخيرا جيت أرغي حداكم

اولا احب انوه انى ما عدتش حاضره لقاءات تاني وبدأت اصدق بجد انكم عيال عينكم مدوره

طب المره الى فاتت وقلت من التبرع المره دي مافيش تبرع اطلاقا

من يوم السبت وانا نايمه يا جدعان مش كده النهارده اول يوم اقدر اصلب طولي شويه طالعلي حبايه فوق عينى

حاسه ان فى مسمار فى مخي

ادعولي ربنا يشفينى والى فيكم عينه مدوره يا الى كنتم فى اللقاء يوم الجمعه هاعرررررررفه

خووووووووووووووووووووونه فعلا

ندخل فى الموضوع بقى

الجواز

ايوووووه الجواز ماله بقى ؟؟

مالكم يا جماعه مش بتتجوزوا ليه ؟؟

طبعا شايفه نص البشريه بتقولك هو فين الجواز ده هو احنا كنا لاقيين

ايوه طبعا قدامك الجواز وبتستهبلوا

سيبنا من الظروف الاقتصاديه والماديات ده موضوعات قتلت بحثا

خلينا فى معنويا انتم ليه كده معقدين من الجواز وخايفين وحاسين ا نكم هاتقعوا فى البحر ؟؟

ليه ؟؟
انت ممكن تختار صديق بكل بساطه ويفضل الصديق معاك طول العمر او ما يفضلش

ما حدش ليه بيخاف اوي من اختيار الصديق زي اختيار الزوج والزوجه ؟؟

عشان الموضوع مش مرعب كل واحد حر فى الصداقه يقدر ينسحب وقت ما يحب

طيب ماهو يا جدعان والله الجواز كده بس احنا الى مش فاهمين

هاتوا الكاتلوج على راي الدكتور اسلام وشوفوا قال ايه

فامساك بمعروف او تسريح باحسان

بس خلاااااص واظن دلوقتي اي واحد يقدر يطلق واي واحده تقدر تخلع ببساطه

بس من غير ما تبصوا لماديات بقى هاتخسر فلوس ماشي بس مش هاتخسر نفسك

مش هاتخسر عمرك وانت بتقول يا ترى اتجوز ولا بلاش يا ترى هانجح ولا هافشل
هو فى ايه عندك اغلى من عمرك ؟؟

اتدخلت مره فى جوازه لواحده كان عمرها 39 سنه وقتها تقدروا تقولوا انها جربت على الراجل يا عينى كل التجارب والاختبارات الموجوده فى ظهر الجدول الدوري

وطبعا فى النهايه قررت انه غير لائق ويا اما يجى مجرد مكمل لحياتها الى اصلا مش ناقصها حاجه يا بلاش

طيب انتى متاكده ان حياتك مش ناقصها حاجه فعلا ؟؟ خليكى صريحه مع نفسك

طيب لو هو كان غير لائق او ما ارتحتيش فى الجواز يا ستى صحتك ما جاتش على هواه هاتخسري ايه ؟؟

اكتر من العمر الى راح عندك ايه خايفه عليه ؟

مش باقولك اتجوزي واحد وحش ولا واحد معيوب ولا قولي ضل راجل ولا اي حاجه من دي

بس بلاش الرعب الغير مبرر ده وبلاش الحسابات الكتير اوي الى بتدخلك فى دايرة وانا ايه يضمنلي انه مش هايكون كذا وكذا وكذا

عشان مافيش ضمانات هى كده اعملي الى عليكى اوزني الامور

اسألوا عليه بجد ناس ثقات اوزنيه بعقلك لما تشوفيه انتى مش قليله فكري

فكري بمخك انتى مش بمخ مجتمعك

مش عيب ابدا يكون عمرك اربعين سنه وعايزه تتجوزي ولا خمسين ولا ستين وطز فى المجتمع الى بعد كده هايدوسك ومش هايفكر هو داس فين

مش باقولك ارمي نفسك باقولك بس اعطي لنفسك فرصه للتجربه

باحس ا حيانا ان الى وصلت للسن ده وما اتجوزتش بتكون خلاص حياتها استقرت على الوضع الى هى عايشاه وما عادش عندها اي مرونه ومن الصعب انها تتاقلم مع حد او تتطبع عليه

ارجوكي حاولي تجربي مش هاتخسري اكتر من عمرك الى خسرتيه

اي خسائر ماديه تتعوض

واي خسائر معنويه مش هاتكون اد خسارتك بعدين واد خسارتك لعمرك الى راح


يا رجاله

بلاش التردد ده

على راي شجرة الدر يا اخويا مرض الجنس البشري

وحياة ابوك شيل من راسك انك ما حصلتش ولا هاتحصل وان البنات على قفا من يشيل وانهم مش لاقيين جواز وعليه وحسب نظرية العرض والطلب انت لازم تنقي النقاوه الى فيهم

لا يا فندم احب اقولك من كل قلبي اتوووووووووكس عشان البنات قاعدين مش لاقيين جواز لسبب واحد

عشان مش لاقيين رجاله

اااااااااه هو في بنت مش عايزه تتجوز ؟؟ في بس مش كتير وجوه نفسهم فى ربع كده بيقول عريس يا امااااااي

يبقى ليه البنات مش بيتجوزوا عشان مش لاقيين رجاله طبعا

فى مثل بيقول ايه قال ابوك مات من الجوع ؟ قاله يعنى هو كان لقى اكل ولا كالش

اهو كده برضه البنات بارت ؟؟ ما لقيتش رجاله نعمل ايه بقى نجيب لهم صينى ولا ايه

فوق بقى انى اكتشفت ان الرجاله هى الى بقت تهتم بالماديات

اه والله عايز يتجوز يكون عنده كل حاجه ااااااه امال يقولوا ايه عليه

بس بشرط مش بعرقه يعنى

تلاقي الى عايز امه وابوه يجهزوه زي البنات وبكل تناحه وصفاقه يقولك ايييييييييييه ماهى فى الاخر فلوس

وتلاقي الى معاه ملمين مثلا وحاسس نفسه بقى فرررررصه الواد جاي من بلاد بره يعنى مش اي حاجه فلوس افرنجي
ويقعد ويانتخ كده فى الكرسي ويتشرط على ابو العروسه ان ابو العروسه يحط اد الى هو هايحطه بالظبط فى الجهاز اااااااااه مش نهيبه هي
طب يا حبيبى ده انت العريييييييييييير قصدي العرييييييييييس انت الى المفروض تدفع مهر وتجهز بيت الزوجيه

ايه انتم مفتريين الحياه تعاااااون والناس كلها ماشيه على كده

طيب طيب تعاون وماشيه على كده يبقى نزل ركلك واقعد معووج واتكلم عدل وقول الى تقدروا عليه اعملوه والى اقدر عليه اعمله
ما تبقاش شحات وعامل نفسك فيها فله وداخل حرب وبتقول هايخسروني فلوسي او نازل السوق وواخدها شطاره وانت بتشتري وكانك بتشتري فازه يعنى (ماشيها فازه )

وبعدين كمان بعد ما حماه يجهز نص العفش بالاضافه الى اكل وخزين البيت والصباحيه ولبس العروسه والبرنس والبجامه بتاعة العريس وهراشه لظهر العريس

يجى برضه العرير ويقعد يانتخ تااااااني ويقول لااااا القايمه دي مش مااااضي عليها انتم كاتبين فيها التلفزيون ؟؟!!


لا دى ماما جايبهولي هديه ده بره اللعبه

طيب يا امور ربنا يخلي ماما ويخلي بابا ويخربيت الى يفكر يجوزك بنته

قدام عينى يا جدعان الواد كان بيستتنح ويقول لابو العروسه تدفع نص تكاليف الفرح

الراجل يقوله مش معايا فلوس يقوله ما يلزمنيش

الله طب انت عايز تروح ترقص فى الفرح الراجل يعمل ايه يبيع عيل من عياله عشان انت تروح ترقص

ما الى عايز يرقص يرقص على حسابه


يا رجاله بلاش استهبال وخليكم رجاله

وبلاش ا لخوف والهروب من الجواز والمسؤليه ليس هذا من شيم ا لرجال

وخد الى على اد ايدك بلاش بنت السلطان وحياة والدك وبعدين ترجع تعيط



يا بنات

مافيش حاجه مضمونه ميه فى الميه ومافيش حد هايبقى هو فارس الاحلام الكامل الفاضل
وارجوكم تمسحوا من نوافيخكم كلام الافلام والروايات الله يحرقهم

فاهمه يا بت انتى (عارفه نفسك طبعا ليكى بوست لواحدك يا فالحه )

اتجوزوا من يتق الله واتجوزي رااااااااجل والله الرجاله نادرين دلوقتي لو لقيتى راجل كلبشي فيه

(حتى لو كان اخوكي فى الدراسه يا مايله ) موضوع كده مالكوش دعوه


اعقليها وتوجهي لله تعالى واتمنى عليه التوفيق وتوقعي كل حاجه الوحش والحلو واسعي للحلو ولو جه الوحش

اهو قدر الله وما شاء فعل


لكم كلكم والله مافيش حاجه تسوى عمركم

عشان خاطري عيشوا حياتكم بدون عقد ولا كلاكيع

واي حد اهبل يخوفكم من الجواز ويلعن ايامه يا كذاب يا فاشل يا الاثنين مع بعض

والدليل على كده انه هايسعى يجوز عياله برضه وما حدش بيتمنى لولاده حاجه وحشه


بس خلاص المهم تتجوزوا ما تصدعونيش
يلا الرجاله على الشمال والبنات على اليمين عشان نوفق اد عشر خماشر راس كده فى البوست ده

بس بعيد عني يا حلوين اااااااه كفيااااااني

اليوم الجميل

السلام عليكم

ازيكم يا يا اصدقائي

اد ايه انا واحشني الرغي معاكم فعلا وبقالي كتير ما كتبتش حاسه انى قربت اصدي بس مين يارب يومين كده وافضى واكل ودانكم من جديد

على وجه السرعه دلوقتي هاحكيلكم على اللقاء الجميل بتاع امبارح والى كان فى المنصوره

نبدأ من الاول

هو اينعم اليوم بدأ معايا بدايه مش حلوه

عشان وانا نازله لقيت مريم بتكح وبدأه دور برد وده خلانى اتاخرت على المعاد وكمان فضل مزاجي مش حلو باقي اليوم

ولما رضا كلمنى كمان العصر وقالي ان حرارتها عاليه اتلخبط على الاخر وانتم عارفين القلق بتاع اليومين دول

ما كنتش هاين عليا اسيبهم والله بس غصب عني مشيت بدري وما كملتش معاهم للمركب وكده عشان اروح اشوف مريم

اليوم كان جميل فعلا وهااااااديء جدا طبعا

اتكلمنا كتير كتير كتير كتير فى حاجات كتيره اوي

اتكلمنا عن فلسفة اللقاءات نفسها ومعناها واهميتها عند كل واحد فينا

واتعرفنا ببعض كويس المره دي كمدونين المنصوره وكمان على ضيوفنا الى من بره المنصوره لان العدد ما كانش كبير اوي زي المره الى فاتت

وعمود نور اقترح فكرة اننا نعمل كتاب منوع زي ما عملنا كده مدونات مصريه للجيب بس تكون بشكل تاني اقترحه هو وناقشنا فكرته ومستنيه منه انا باقي الكلام فى الموضوع ده ان شاء الله

نقول الحضور بقى ويارب ما انساش حد

شيماء الشعب لا بد له من حكومه تشكمه
ساره رحيل
بسمه انور
دعاء مجرد حلم
حلم كان
محمد شحاته بلاد السحر والخيال
ابراهيم العدوي كاتب مصري
ابراهيم مواطن شوجاع
مصطفى فك زنقه
محمد عمود نور
كيمو صوت من مصر
بدراوي
صلاح مسدس صغير
محمد انها حياتي
محمود حشمت
ايمن بدر العرضحالجي
بوكيه ورد
وكان فى مدونه جت فى الاخر يا جودعان وقعدت بعيد عني ما لحقتش اتعرف عليها لانى زي ما قلتلكم مشيت بدري تعالى يا جميله قوليلى معلش اسمك واسم مدونتك تاني

بس خلاص نسيت حد ؟؟ طب الى اتنسى يرفع ايده فوق عشان اشوفه

تعليقى بقى على الناس الي اتعرفت عليهم فى التجمع ده

بدراوي عاجبنى انك بتفكر كتير بس اسلوبك فى عرض فكرك ورايك مش صح وما بتعرفش تسمع راي غيرك وما بتقدروش كده هاتتعب ومش هاتتعلم كتير اتعلم تعرف فكرتك بشكل واضح وتسمع كمان راي الاخرين وتفهمه وتحترمه عشان توصل للحق والحقيقه لازم تعمل الى انا قلتلك عليه ده يا باشا انت نورتنا

محمد عمود نور طبعا مستنيه منك بجد متابعة موضوع الكتاب عاجبنى حماسك اوي للكتابه وانت من الناس الى انا فرحانه بمكسب معرفتهم فى اللقاء ده فعلا بس ليا تعليق من فضلك خليك اهدى فى المواجهات والنقاشات عشان تقدر تسيطر على مسار الحديث وتخلي الناس تسمعك اكتر وبعدين هما نقاشين ثلاثه من بتوعك دول وتلاقي شعرك ابيض يا بابا بالراحه على نفسك ههههههههههه

وبطلوا بقى تتلزقوا فى المنصوره مش معقول كده ههههههههههههههههه

صلاح العميري ما كانش عاجبنى خالص فى اللقاء وسألته كتير مالك ما رضيش يقول بس هايروح مني فين كرسي الاعتراف مستنيه

البت ساره رحيل دي عسل اوي يا جدعان هاديه وراكزه كده وعاقله وحلوه وكده يعنى

دعاء مجرد حلم كانت عماله تغيظني هى ومحمد عمود نور ويصوروا النيل وانا ما كانش معايا ذاكره اصور ولو ما بعتوليش الصور هاموتهم ان شاء الله

شيماء دماغك ناشفه وهاكسرهالك طبعا انا وهى ناكفنا فى بعض وبوسنا فى بعض لما قولنا بس

بسمه انور هاديه جدا جدا جدا ما كانش باين عليها على الميل والمدونه ليه مش عارفه

حلم كان مش هاقول بقى الى حصل فى المسجد عشان تعرفي انى جدعه هههههههههههههه

ابراهيم العاتشفى قصدي ابراهيم العدوي انا وشيماء عاكسناه لما كان هايفرفر مننا يا عينى وبعدين لبس البالطو الاصفر وعمل فيها كروموا وفضل يقولنا العسس بيتعسس عليكم بس احنا الحقيقه نفضنا للعسس وقعدنا ناكل السندوتشات بقى ههههههههههههههه

ابراهيم مواطن شوجاع هادي اوي وادار نقاش حلو اوي عن اهمية اللقاءات والى اتكلمنا فى كتير على اثر شوية كلام مفقع اتقال قبل اللقاء بتاعنا وكلنا تقريبا اتفقنا على ان السبب الاساسي لاننا بنعمل اللقاءات دي هى اننا بنحاول نعرف بعض وتحويل الشخصيات المجهوله لبعضها والعالم الافتراضي الى واقعي يعنى الهدف الاساسي اننا نتعرف على بعض

نعمل بقى نشاط خيري ما يضرش نناقش افكار معينه ما نقولش لا نتفق على اي مشروع ادبي ولا غيره نعمله سوا برضه ماشي الحال
لكن كلنا تقريبا فعلا جايين اللقاء عشان تعرف بعض بكل احترام وادب ورقي فعلا ربنا يكرمكوا يا شباب انتم تفرحوا بجد


محمد انها حياتي كنت حاسه انه قاعد فى كورنر مركز مع الكل وبيتعرف علينا كلنا واتمنى تنشط مدونتك وتكتب وتبقى تعلق عندي عشان اعرف مكانك

محمود حشمت وبوكيه ورد والعرضحالجي جم متاخرين شويه لكن اتشرفنا بمعرفتكم ونورتونا

اه نسيت اقولكم مصطفى فك زنقه ومحمد شحاته كانوا جايبين معاهم اخواتهم البنات بنتين عسولين كده وهادين وصغننين يا اخواتي
بس يا عينى احنا انقضينا عليهم فجأه خضيناهم ليه بقى

احنا ساعة صلاة الجمعه خلينا الرجاله راحوا صلوا هما فى المسجد الى بره وقلنا لهم احنا هانصلي هنا فى مسجد النادي وبعتناهم وقلنا لا يونكن ابدا نضيع الفرصه العظيمه دي ونحقق امنية حياتنا ونرغي ونلك لك حريمى براحتنا شويه شوية اكشوجين يا عالم

وهاتك بقى يا رغي وفجأه البت شيماء قالتلي بؤين فى ودني قمت انا وهى مبرقين للبنتين يا عينى واشارنا اليهم باصابع الاتهام وقلنا خيااااااااااانه العيال دول اخواتهم من الشوباب الى معانا وبعدين بقى هما يا قلب امهم اترعبوا وقالوا اطلااااااااااقا احنا مش من معسكر الاعداء فقولنالهم بقى ماشي زي بعضه بس على الله الاقي كلمه راحت كده ولا كده هاتتقتلوا انتم على طول هههههههههههههههههههههههه

انا بقى حكيت للبنات حواديت حلوه اوي وتركيزا على قصص الناس الى استهبلوني على النت نظرا للاحداث الفائته القريبه

اه وشمس كلمتنى فى التليفون وعرضت عليا الحمله بتاعتها الى هى لا للخداع والكذب على النت عايزين نت نضيف
طبعا انتم عارفين الحمله دي جت على هوايا موت واتناقشنا فيها مع الناس امبارح شويه وان شاء الله نروح لشمس الى نورت البلوج نشوف ايه الموضوع

واتصل علينا حازم من غزه ربنا يكرمه والله كان الواحد حاسس انه معانا بقلبه فعلا رسايل واتصالات وكان منورنا

وعاشقة الرومانسيه كلمتنا برضه وتامر الى كان بيقولي هو انتم عملتم اللقاء بصحيح ؟؟!! ومش فاهمه لحد دلوقتي يعنى ايه

وقبل التجمع بيوم اتصل عليا الاستاذ محمد مدونة شوية كلام واتمنا لنا لقاء سعيد ربنا يكرمه اتشرفت باتصالك يا فندم

اه ورييييييم الي هاتضرب لو ما شوفتهاش بنتها تعبت وما جاتش ربنا يشفيها هى ومريم بنتى بس كلمتنا فى التليفون حقدت علينا بكفايه

المهم بقى ان انا كنت اكبر واحده فى اللقاء تخيلوا ؟؟
مع انى عندي 18 سنه زي ما انتم عارفين وكل شويه البنات يقولك الكبير الاول قولي يا صبرني حتى فى الصلاه انتى الكبيره صلي بينا اقولهم يا كلااااااااب انا عندي 18 سنه مافيش فايده

اه وبالغيظه فى كل الى ما جوش انا كنت عامله كيك بالشيكولاته واكلير بالجبنه وكانوا حلوين اوي

وابراهيم استولي على باقي العلبه وقالي هانقنق واحنا فى المركب ههههههههههههههههه

بتهيئلي انا قلت كل حاجه اهو عشان ستيته كانت هاتضربني من شويه عشان ما حدش اتكلم عن اللقاء

وشايفه البت شيما عماله تعض على صوابعها من الغيظ وتقول كده يا صبرني بتحكيلهم ليه مش انا قلتلك ما تقوليش حاجه خليهم على نار
هههههههههههههههههههههههههههه

احب اقولك هى دي النداله يا حبي ايه رايك فيا وانا ندله نيهاهاهاهاها

بس خلاص وعقبال كل مره

لقاء مدونين فى المنصوره(تحديث)

تحدييييييييييييييييييييييييييييييييييييث

يا جماعه عندي رساله لكم من رامز عباس يعنى هى متاخره شويه بس برضه هاعرضها

يتعلق بدعوتكم لحضور اليوم العالمى السنوى الرابع عشر لمتحدى الاعاقةبكلية الطب جامعة المنصورةاحتفال شامل المعارض والعروض الفنيةوورش العمل الخاصة ببحث واقع ذوى الإعاقةثم التكريم وإعطاء شهادات التقديريحضره فنانون ووسائل اعلامبناء علي دعوة المركز الفرنسى للثقافة والتعاونوالجمعية الفرنسية للتعاون بالمنصورةوجمعيه أنس الوجود التعليميةوعشرات المؤسسات والجمعياتوبصفتى من ذوى الإعاقة وأحد أصحاب القضيةومن منطلق نشاطى بدمج المجتمع وتعريفه بنا وهو نشاط خاص بى أدعوكم خاصه انكم قاطنى المنصورةواعتذر لتأخرى عن دعوة مبكرةالاحتفال غدامن التاسعة صباحا وحتى التاسعة مساء بإستطاعتكم القدوم وقتما يتاحفالمعارض والاحتفالات ستكون طوال الوقت والاحتفالات من المغرب حتى الانتهاءوهذا سبق تنفيذه العام الماضىوفقكم ووفقنا الله

***********************************************

السلام عليكم يا مدونينا الكرام

عندنا تجمع فى المنصوره يا قوم

قولوا هيه بقى وزيطوا وكده

تعالوا الاول احكيلكم الحكايه

من يوم ما اتقابلنا كلنا فى المنصوره المره الى فاتت فى لقاء التبرع بالدم والبت شيما صاحبة مدونة الشعب لابد له من حكومه تشكمه

وكل ما تشوفني تقولي البنات بتوع المنصوره عايزينا نتقابل تاني كده فى الخباثه نتعرف على بعض اكتر اصل احنا ما لحقناش نشوف بعض

قلتهم يا مرحبا ياريت رتبي يوم ويكون جمعه كده وانا معاكم فى الحلاوه ان شاء الله

ومن يومها كل ما نظبط يوم يحود على اليوم الى بعده فطبعا انتم عارفين مافيش حاجه بتستخبى الكلام بقى راح شمال ويمين وقالك صبرني هاتعمل كيكه تاني وكلام ده (شكلي هافرقعكم )

فالمهم حريم الدهاشنه خدوا خبر فى المحافظات الاخرى يعنى وفى زمره من البنات قالوا جاااااااااين فيها لنخفيها (كل ده طمعا فى الكيك انا عارفه )

قوم برضه الشوباب بتوع المقاطعه هنا قالوا لا ممكن ابدا هانيجى يعنى هانيجى وفيها لاخفيها والناس الى ما حضروش المره الى فاتت بالذات

شيما قلقت بقى وقالت وبعديييييييين مش عازين حد من معسكر الاعداء احنا عايزين نقعد قاعده حريم كده مع بعضينا

ونرغي بقى وكده يعنى

وعليه بقى بعد ما عملنا لجنه عليا اخدنا القرار انه لقاء مفتوح الى عايز يجى يجى اهلا وسهلا ما نقدرش نقول لحد لا

واي عناصر طمعانه فى الكيك حسابهم معايا هناك بقى

واللقاء يا ساده يا كرام هايكون يوم الجمعه الجايه الموافق 25 ديسمبر

في تمام الساعه العاشره صباحا فى نادي الاطباء بالمنصوره

يعنى باقي تفاصيل اليوم بقى نبقى نتفق عليه لما نتقابل عشان مش عايزه رغي كتير بقى

وطبعا يوم اللقاء هايكون معايا التليفون بتاع اللقاءات الى هو ده

0126379796

وهافتحه يوم الخميس شويه كده اخر النهار عشان لو حد له استفسار عن الطريق او اي حاجه

وطبعا يوم التجمع هايبقى مفتوح من الصبح

وان شاء الله المنصوره هاتنور بضيوفها يا جماعه

ومتشكره اوي على لكم جميعا

عايزه بس اقولكم كلمتين يا جماعه

اولا اشكركم بجد اوي على كل الناس الى قلقوا عليا والله ما كان قصدي اقلقكم ولا اعمل فوازير ولا حاجه بس ما كانش عندي مزاج ولا وقت ارد على الناس فقفلت الردود

وعشان فى ناس كتير اوي سألوني فى ايه ومش فهموا الموضوع معلش هاقوله بسرعه

كل الحكايه انى من بعد ما واحد ابتز مشاعري لمده سنه ونص ومفهمنى انه عنده مرض عضال وقعدت اعيط عليه لما شبعت واتألم معاه لما شبعت برضه والاخر طلع بيلعب بينا جميعا وكذاب ومش عارفه حتى كذبه واصل لحد فين

المهم انا قررت انه كفايه كده وانى اه اعرف كل الناس من غير شروط لكن من حقي لما اعتبر شخص منهم صديق فعلا انه يعلن عن شخصيته ويقولي هو مين وبيشتغل ايه وفين وده اقل واجب

وعليه (مش ده بس لا شوية حاجات فوق بعض) قررت ان كل من يرجو صداقتي واخوه صادقه فى الله يجيب بطاقته فى ايده وهو جاي غير كده يقدر يكون برضه موجود بس مش صديق بالمعنى المعروف للصداقه

صدمت شويه ان اثنين هما اعز اصدقائي (الى مش من عالم التدوين ريحوا نفسكم )رفضوا وقرروا يخسروني عن انهم يعلنوا عن شخصيتهم وده ضايقنى لكن مافيش مشكله هاتعدي

انا حاليا عندي شوية ظروف مش فاضيه اساسا ازعل يمكن لما افضى ابقى اكمل زعل

طبعا لهم مطلق الحريه وليا انا كمان مطلق الحريه

بس خلاص

فهمتواااااااا ؟؟ مش عايزه دوشه وكلام فى الموضوع ده تااااااااااني

اه معلش يا جماعه لو اتاخرت عليكم فى الردود والزيارات لمدوناتكم عندي ضيوف الاسبوع ده وظروف كده فمش هابقى فاضيه خالص

لا تهاون ولا استسلام

قرار البطاقه ساري

من حقي اعرفكم زي ما انتم عارفينى

لا تهاون ولا استسلام ولا استثناءات

.

.

.

.

.

.

.

صعبان عليا نفسي اووووووووووووووووووووووي

اسفه واضح اني شوفتنى اهم مما انا عليه

واسفه على قفل التعليقات مش هاقدر ارد على حد

شكرا يا اصدقائي ... والكيك بالشيكولاته

الاول متشكره اوي لكل من طبطب عليا فى البوست الى فات

وبجد كلامكم فكرنى بكلمة فاتيما على البلوج بتاعها وهى بتقول كلام بيطبطب على روحي

شكرا لكم اوي اوي

وانا كويسه ما تقلقوش بس لسه عندي شوية هسهسه فى الدماغ بكره يروحوا برضه ان شاء الله لو فى نصيب

والدليل على ذلك انى عملتلكم الكيك بالشيكولاته يا بنات

عشان من يوم التجمع بتاع المنصوره وانا وعدتكم اعمله على المدونه

يلا على الكيك بالشيكولاته

واي خدمه

مش عايزة وجع قلب

مش عايزه وجع قلب

السلام عليكم

ازيكم يا اصدقائي الاعزاء

الحقيقه شايله فى قلبي كلمتين واجعينى من كام يوم قلت أجي اقولهم جايز ارتاح نفسيا

عايزه اعرف يا جماعه احنا ليه بنستخف ببعض ؟

ما بنقدرش ولا بنهتم ببعض بشكل محترم ليه ؟

من غير ما أرغي كتير وأصدعكم

ليه مثلا الاقي واحد او واحده من أصدقائي يكلمني ويحكيلي مشكله مثلا وأنا كشخصيه هبله (او ده ما اكتشفته )

اقعد مثلا قيمة ساعة اتكلم معاه فى مشكلته وابات الليل أفكرله وجايز يصعب عليا ويقطع فى قلبي .

وبعدين ممكن جدا بكل بساطه يختفي بعدها مثلا اسبوع وانا انشغل بجد (مش قلتلكم هبله ؟) وبعدين بكل بساطه
يجى يقولك اه لا ما المشكله خلصت خلاص

أو بشكل اسخف واسخف يقولي الله ؟ انتي صدقتي ؟ ده انا كنت باهزر ؟؟!!!!

بتهزر ؟؟؟؟

الله ؟؟!!! طب والهبله الى انت صدعت دماغها دي مافيش أي مرعاه لوقتها ودماغها الى مش ناقصك اصلا ؟؟

تخيلوا لما واحد صفيق يخوت دماغي بحواديت طويله عريضه وبعدين بعد ما يخلص الكلام اقلبها فى دماغي

الاقيه بيعملنى كبري يوصله به رساله لشخص اخر ؟؟؟

ودي ابسط الامور

والى يغيظ اكتر واكتر ان ما حدش فيهم عيل ولا حد فيهم ولا عنده تخلف عقلي ولا بله منغولي


ليه كده ؟؟ ليييييييييييييه كده يا بشر ؟؟



لي انا باحترم مشاكل الناس واوجاعهم واسمعهم بكل اهتمام وهما ما بيهتموش يبصوا وراهم بعد ما يصدعوني ؟؟
عشان انا هبله ؟؟
لا ده مش هبل والله ده فى رأي هو الصح والاخلاق الى ما تخلناش ابدا نستخف باوجاع الناس


أنا غلطانه انى بانفعل بمشاكل الناس وأشيل همهم ؟؟

أنا غلطانه لما اعتقد ان اكتر الناس محتاجين حد يسمعهم وقلت اسمعهم ماشي وليا فيهم ثواب بالتفريج عن مؤمن وكمان بالنصيحه الخالصه لوجه الله تعالى ؟؟

أنا غلطانه انى باصدق الناس ؟؟؟

لا انا مش باصدقهم كده اوانطه

لكن مش باكذبهم ما اقدرش

الرسول عليه الصلاة والسلام قال : لا تصدق كاذبا ولا تكذب صادقا

وما دام انا ما عنديش حاجه اثبت بها الصدق والكذب باقف فى النص كده واقول ان صدق فقد نصحته وان كذب فأنا خدت ثوابي
وده الحقيقه كان مبدأي وما كنتش باشغل بالي كتير اوي بتحليل كلام الناس

ولما باحس ان حد كذاب باقنع نفسي انه مش مهم سيبك منه واعمل نفسي مصدقاه واخد على اد عقله لكن بابقى مخنوقه منه طبعا .

لكن برضه مش باكذبه ما اقدرش افرضوا طلع صادق

لكن الحقيقة المبدأ ده برضه رغم انه صح انما سببلي انا وجع علم فيا .

تخيلوا لما تحس انك استغليت من واحد مجنون واهدرت وقت ومشاعر ودموع راحوا كده فى الهوا

تخيلوا احساس انك كنت اشتغاله حلوه ومسليه على الاخر

وتخيلوا لو هو اشتغل حد بسببك كمان تحس بالذنب اد ايه حتى لو كنت حذرتهم انك ما تضمنوش

طبعا اسفه لهم كلهم لو كنت السبب فى اذى نفسي لهم
وسامحوني يا اصدقائي

نفسي اعرف لييييييييييييييييييييييييييييه

ليه ممكن حد ياذي الناس كده

عموما كل من ليا حق عنده واستهان بوقتي ومشاعري وتفكيرى انا مش هاسيب

حقي وهاخده منه هناك فى دار الحق بيد الحق يوم الحق


طبعا كل الى ما يعرفش التفاصيل بيقول صبرني اخده قلم جامد معلم فيها

اه بس ما خدتوش مره واحده لا خدته على مراحل

عشان اتخنق اكتر

دلوقتي ميت حاجه بتلف فى دماغي

ابطل اكلم أي حد على النت ؟

ولا اكلم الى اعرفهم معرفه شخصيه بس ؟

ولا اطلب من كل اصدقائي على النت سي فى وصورة البطاقه ؟
اه اشمعن انا

انا معروفه لكل الناس معرفه تامه

بدأت اندم على كده بس انا ما باعرفش اعمل كده

ما اعرفش استخبى وما اعرفش ابقى ليا اكتر من وجه واكتر من حياه


ميت حاجه بتيجى في بالي لدرجة انى فكرت اقفل حتى المدونات واختفي ولو حبيت اكتب تاني اكتب فى مكان تاني باسم تاني وما اعرفش حد تاني

مش عايزه بجد وجع قلب
تعبت

انا فيا الى مكفينى

اينعم انا ساعدت ناس كتير وافدت ناس كتير وناس كتير اوي باحبهم فعلا زي اخواتي واكتر والله من معارفي على النت

اينعم انا عارفه ومتاكده انى خدت ثواب كبير وكتير فى ناس كتير الحمد لله تعالى

بس برضه مش قادره اتقبل الفكره دي

فكرة وجود ناس بتستخف بمشاعري ووقتي والمي ودمااااااااغي الى بتنشغل معاهم

عموما ومؤقتا
ممنوع منعا باتا أي حد بعد كده يحكيلى أي وجع قلب

مش عاااااااااااااايزه وجع قلب

والناس الى على الاميل انا واخده اجازه من الاميل كام يوم على ما ارتب افكاري

وطبعا صدعتكم بس عادي مافيش جديد

بؤجه الخير (تحديث )

تحديييييييث :

شكرا يا جماعه بجد لكل الناس الى اهتموا بحضوري وكانوا مستنيينى

وشكرا اوي يا داليا والله انتى وفاتيما وابي وخيخه على اصراركم على حضوري بس والله غصب عني

وسوووووووووري للجميع وكان نفسي اشوفكم بجد اووووووووي

اه وشكرا للناس الى ردوا عندي وانا ما رديتش عليهم فرادى

ويوم سعيد ان شاء الله وناجح

السلام عليكم يا مدونينا الكرام

نحيطكم علما ( حلوه مووووووت فى الجوابات الرسمي انا )

من الاول بقى

نحيطكم علما ان المدعوه داليا قوس قزح والمدعوه البت خيخه واي كلام (طول عمرها ) والمدعوه آبي هانم بتنجاني (برضه طول عمرها )

عاملين دعوه للخلق كلها ان شاء الله يوم الجمعه 11 ديسمبر

يعنى الجمعه الجايه دي على طول لتجمع خيري تحت شعار بؤجة الخير

يعنى ايه بؤجة الخير ادخل هنــــــــــا وانت تعرف القصه كله

ودي التفاصيل عند داليا قوس قزح

وكمان عند خيخه

وكمان عند آبي

وعند فاتيما

وسامعه البت داليا بتجز على سنانها وتقولي هاعضضضضضضضك لو ما جتيش

وشموسه حياتي مستنيانى اقولها هاروح ولا لا عشان تيجى لو انا هاروح

هاموت يا جودعان واشوف البشر كلهم

بس اعمل اييييييه مكبلة الايدى انا

عموما انا بحاول محاولات مضنييييييه

وقدامي 3 خيارات فشل منهم او خيار تمام

ربنا يسهل فى باقي الخياررررررريات بقى

ادعووووووولي احسن والله اقعد اعيط واقطع فى شعري يوم الجمعه كله

وافضل اكلمكم احقد عليكم واقول خووووووووووووووووونه

ادعوا بزمه بقى

لا لتبادل الادوار ... كل واحد يخليه مكانه

السلام عليكم

ازيكم يا حلوين بقالي كتير ما رغيتش وواحشني الرغي موت موت

اه الاول احب انقلكم خبر مهم هو ان ريم صاحبة مدونة رسائل بلا بريد عزلت من مدونتها القديمه وهى الان فى مقرها الجديد الى هو ده

رســـــــــــــــــــــــــــــــــائـــــــل بلا بريـــــــــــــــــــــــد

مبروك يا ريم العتبه الجديده يا اختي يارب خير عليكى ان شاء الله

يلا بقى هيا بنا نرغي

موضوع مهم النهارده عايزين نتكلم فيه

وايه الجديد ما انا كل مواضيعى مهمة يا ناس

المهم خطر على بالي سؤالين فى اطار الصراع الابدى بين الازواج و حتى الرجل والمرأه عموما

صراع الحقوق

اه كل واحد بيحاول ياخد حقه لا حتى ده بيحاول يجور على حق التاني بصرف النظر عن كونه واخد حقه ولا لا

ليه مش عارفه

طيب الطرف الى بيجور على حق التاني ده وياخد اكتر من حقه تفتكروا بيبقى سعيد ؟؟

يعنى الراجل الى بيلغي شخصية مراتة مثلا ويلغي رايها ويخليها كما يحلم اغلب الرجال طوع ايده وتحت امره

تفتكروا هو بيبقى كده سعيد ؟؟

والست الى بتعمل كده مع جوزها برضه بتبقى سعيده بحياتها ؟؟

بتهيئلي لا طبعا

بلاش ده

تبادل الادوار

بمعنى ان الست تشتغل وتصرف على البيت اكتر يمكن من الراجل وتقضي مشاوير البيت وتشيل اثقال وتربي العيال لواحدها وتسوق وتودي دروس ومدارس ونوادي وتعمل هى كل حاجه فى الدنيا
تفتكروا هو هايبقى سعيد ؟؟؟

والراجل الي برضه ممكن يتحمل اعباء البيت وياخد هو باله من الولاد ويربيهم لواحده ويكون دور الام مهمش لا سبب كان حتى لو كان شغلها
تفتكروا هى كده هاتبقى سعيده ؟؟؟


بتهيئلي لا بررررررضه

طب ايه ؟؟

وليييييييه ؟؟

ليه مش كل واحد يعيش دوره وكل واحد ياخد حقه ونعيش كلنا مبسوطين

صدقيني لو شلتي كل حاجه لوحدك مش هايبقى مبسوط
مش هايلاقيكي معاه
مش هايحس بيكى
وهاتبعدي عنه ويبعد عنك اكتر

هايلومك انتى على البعد ده ويقول انشغلتي عني
ما تريحهوش اوي الراحه احيانا بتكون متعبه

يا عزيز الرجل

صدقني انت كمان والله ما لمصلحتك ابدا انها تشيل عنك كل حاجه وتتحول انت للمول مادي فقط فى البيت

الى انت فى بداية حياتك سعيد له ورتبتله وهو انك تريح دماغك من العيال ومسؤليتهم

هاتصحى فى يوم تلاقيها لها دنيتها والبيت كله قائم عليها وانت البنك بس

وفى حالة برضه انك تلغي شخصية مراتك وفكرها وتبقى انت الواد الفظيع الى ما جبتوش ولاده وراااااااجل جامد موووووت

هاتلاقي نفسك يوما ما مشارك حياتك مع واحده ما لهاش دماغ اصلا جثه يعنى

فى كلا الحالتين

هاتلاقي نفسك اربعينى وحيد ومش هاتكون سعيد ابدا ابدا

يا ستات
خلي دورك دايما انك تكوني اولااااااا ست وبعدين زوجه وام

خلي دورك دايما انك تكون راجل(بكل المعنى الراقي للكلمه دي ) وبعدين ابقى اعمل فيها عم المهم زي ما انت عايز

يا ستى خليكى انثى زي ما انتى مش لازم تبقى دايما عشر رجاله فى بعض

خليكى كده لما يكون جوزك مش موجود انما طول ما المحروس حسه فى الدنيا خليكى ست زي ما انتى

الرجل دايما يحب يحس انه راجل وان مراته محتجاله

حتى لو كان الاحتياج ده افتحلي برطمان الصلصه يا ابو محمد اصل جامد على ايدي

او افتحلي الكانز يا تامر اصل ضفري يتكسر

حسب الظروف بقى

( دلعنى يا معلم عاااااااااادي )

وانت وحياة ابوك بلاش الاستهبال وتعمل فيها فالح بس وتقولها ما تكلميش ابن خالتك الى كان عايز يخطبك

وبعدين تسيبها تتبهدل يمينا ويسارا فى الدنيا

من فضلكم كل واحد يقف مكانه

كل واحد يادي دوره

كل واحد ييسب التاني يعيش دوره ويقف مكانه

حقي وحقك والحق حبيب الله

خليكى انثى زي ما انتى

خليك رااااااااااجل

حافظوا على المساحه الى بينكم من الخصوصيه واحترام الاخر وفكره وعقله وشخصيته وماله

صدقوووووووووني انا الحق حبيب الله

بس خلاص.

العيد فرحه ... وفته ولحمه

والله انا ما مخليه فى نفسكم حاااااااااجه

مهنياااااااااااكم ادي العيد فرحه بتاعة صفاء ابو السعود الى سمعاها يعنى العيد بالنسبه لي اساسا

ولو نزلتم تحت شويه هاتلاقوا طبق الفته المعتبر اي خدمه

كل سنه وانتم طيبين

اضحى سعيد عليكم جميعا يارب واحد وااااااااحد

طبعا مش هاعرف اعدكم ولا اقول مين ومين لكن ربنا عالم بالى فى قلبي للكل هنا

حقيقى انا متشكره انكم موجودين في حياتي

تاكدوا ان كل واحد فيكم اثر فيا بشكل او بآخر

يارب يكون عيد سعيد عليكم وعلى اسركم واحبابكم كلهم

وعلى المسلمين والدنيا كلها

وتكونوا صليتوا العيد كلكم وعيدتم على بعض

انا اول مره اروح اصلي العيد وانا معايا العيال

كنت فرحااااااااانه اوي لان روحنا اكبر ساحه بيصلوا فيها فى المنصوره الى هى الاستاد

وصدمت صدمه ما بعدها صدمه من كمية البشر الى هناك على جميع المستويات والاشكال والاصناف

الى فرحانين اوي

والى لما تشوفهم وبالذات الناس البسيطه منهم تحس ان وشهم بيقول فرحانين رغم كل شيء

وتكونوا اكلتم الفته واللحمه بتركيز كده والعمليه ظبطت معاكم

والى ما اكلش الفته انا جبتله طبق فته مظبط مربط اهووووو وبلحمممممممته ولسه سخن وحياتكم عندي

ووصيتي ليكم دايما عيدوا بضمير

وانسوا اي حاجه مزعلاكم وافرحوا وفرحوا الناس الى حواليكم

وبافكركم دايما ان العيد فرصه حلوه اوي لتصفية الخلافات والصلح خير تيجوا نتصالح وكده يعنى

وربنا يكرمكم ويسعدكم كلكم يااااااااااااااااارب

وهناااااااام بقى ما حدش يصحينى عشان انا ما نمتش لسه والله

افترااااااااا

الحكمة ... موضوع الرؤية الجديد

"ومن أوتي الحكمة فقد أوتي خيرا كثيرا "

الحـــــكــمــــــــه ومكانتها

الموضوع الجديد على

رؤيه اسلاميه متواضعه

الى انا غبت عليها اوي وزعلانه من نفسي بقالي كتير

اتفضلوا شرفوني هناك

تكعيبة الياسمين

تكعيبة الياسمين


نفسي افرد إديا للهوا وأغمض عنيا

نفسي أجري على شط البحر ... والموجه تلمس رجليا

نفسي اركب فرس يسابق الريح

وسط صحرا .... رملتها صفرااااااااا

نفسي اقعد تحت شجره ... واسمع صوت الطيور

واشم ريحة الزرع وترابه


نفسى أرجع بنت ست سبع سنين

أضحك .. وأملا الدنيا ألف ضحكة

و اقعد معاك على الحصيرة تحت تكعيبة الياسمينة

وساعتها أرسملك جوه إيدك قلب محنى


وكنت اقولك.. خلي قلبك دااايما ملك ايدك

وكنت يومها تقدر تحط راسك جوه حجري

و تحكيلى كلام كتيييييير... وتقولي خليه فى سرك

وكنت جايز يومها أنا أقدر احكيلك كتير

تحت تكعيبة الياسمين

انا قلت اطري على قلبكم بقى بعد الى حصلكم فى الايام الى فاتت واروق عليكم

اي خدمه ما تقلوش حارماااااااااكم من حاجه

الاسره الحاكمه ؟؟!!

الاسره الحاكمه


فاكرين الاسره الحاكمه

ايوه بتاعة زمان والبشوات الشريرين الى كانوا واكلين عرق الفلاحين

والى علموا على ظهور الشعب بالكرابيك

فاكرينهم ؟؟؟؟؟؟؟؟؟؟؟؟؟؟؟؟؟؟

انا بقى مش فاكراهم


هاحكيلكم على حاجه فرستنى اوي يا جماعه

من فتره كده البنك الى بنتعامل معاه بعتلنا تعالوا عايزينكم لاستكمال بيانات

وروحتلهم انا ورضا

لقيناهم بيدولنا استمارات كده وبيقولوا املوها

بصيت فيها وقلت للموظفه ايه ده كله عشان ايه

اسأله كتيره بقى


قالتلى ده بيانات مطلوبه لمكتب مكافحة غسيل الاموال وتمويل الارهاب (مكتب ا و حاجه زي كده مش فاكره والله )

قلتلها اوك

وقعدت اجاوب على اسأله تفرس الحقيقه لواحده زيي اصلا الحساب بتاعها يكاد يكون فاضي

حتى ايام ما كان فيه مبلغ ما فيش أي عبيط فى الدنيا يقول انه له علاقه بغسيل الاموال وهذا البتنجان

المهم قعدت اجاوب

خد عندك بقى السؤال الى جابنى لمس اكتاف

السؤال بيقول

هل لك صلة قرابه او أي صله بالاسره الحاكمه ؟؟؟

( الاسره الحاكمه العائله الحاكمه والله ما انا فاكره النص بس يعنى هى كانت كده )


حد يقولي ده ايييييييييييييييييييييه

اسره حاكمه ؟؟؟

بصيت للموظفه وقلتلها اسرة حاااااااااكمه ليه احنا فين

فين الديموكراتيه يا طنط

بصتلي بوش مش فاهم حاجه وقالتلي احنا ما لناش دعوه الورق ده جاي لنا من البنك المركزي

الحقيقه فاتت عليا اخد صوره من الاستمارات دي اوريهالكم بس لو روحت البنك هاسألهم عليها بجد


كلوا بقى فى نفسكم قولوا توريث ما توريثاااااااااش قولوا الى انتم عايزينه

باختصار هووووووووووواااااااا براحتكم

بابا ساعات يدينى الجرنال ويقولي اقرى كده النعي ده

طبعا فى الغالب بيكون النعي ده من الى بياخد صفحه كامله ده وحركات

النعي ده بقى تلاقيه لحد من البهوات ( اوعى تقول بشوات عيب مش اقطاعيين هما )

المهم

تلاقي بقى عم كل من واخو كل من وابو كل من ونسيب كل من

اقرا الاسامي يا معلم تلاقي الشله الحاكمه كلها موجوده واكتشفت من خلال الموضوع ده بجد صلات قرابه كتييييييير بين مسؤلين هذا البلد

وفجأه تلاقي نفسك عارف ليه الاخ ده مبلط فى الوزاره بقاله سبعة الاف سنه على التوالي

وتلاقي نفسك كمان فجأه وسط النعي اسامي بتاعة ناس بتقول ونسبنا الحكوووووووومه وبقينا قرايب

وتعرف برضه ساعتها نجمهم فى السما لييييييييه

كنت دايما اقراها واقول لبابا بتريقه الاسره الحاكمه

لحد ما قالوها هما وجابوا من الاخر وريحوا نفسهم

طيب مش كانوا يقولوا من الصبح بدل تعب القلب ؟؟؟؟؟؟

حد يرد علينا يا جماعه

حد يقولنا البنك المركزي ده بتاع بلد تانيه عندهم اسره حاكمه

حد يقولنا لااااااا مش بلد تانيه وانتم هنا عندكم اسره حاكمه وما تتعبوش نفسكم وتفكروا احنا مخلصين العمليه

حد يقولنا احنا مين وفين وليه وعايزين ايه وهانعمل ايه وهاتعملوا فينا ايه ؟؟؟؟؟؟؟؟؟؟؟؟؟؟؟؟

على فكره انا واخده علاج بينيم ومهيسة

حد يجهزلي شهاده بكده يا جدعان جايز احتاجها هناك


وطبعا مش محتاجين اقولكم من الصوره الى فووووووق دي انا باتكلم عن الاسره الحاكمه مييييييين

ايوووووووه برافوا عليكم

فى احد بلاد الاكواويين دول

كفايه كده بقى بلاش رغي على فكره

مصر هى امي

السلااااااااام عليكم يا شعب مصر

وصباااااح الخير عليكم

بس قلت اقول للناس مبروك وان شاء الله يكملها ربنا بالستر

حبيت بس اقول كلمتين لفوا فى دماغي امبارح

****************

شكلنا حلو اوي يا ولاد واحنا متجمعين على كلمه واحده

واحلى واحلى والكلمه دي بنقول فيها ياااااارب

احنا فيييييين مش كده على طول ليه

*********************

علم مصر والناس ماسكاه وبتقول مصر مصر حلو اووووووووي

ما عدناش بنعمل كده ليه ؟؟

انا اكتشفت ان علم مصر وحشنييييييييييييي

************************

الاغاني الوطنيه حلوه اوي يا ناس

من زمان جسمي ما قشعرش وانا باسمع اغاني وطنيه

عشان ما عادش فى اغاني وطنيه تحولت من مصر هى امي الى فوق دي والى كنت باغنيها فى حفلة المدرسه وانا صغيره

الى اخترنااااااك اخترنااااااااك

وياريتنا بصحيح اخترنااااااااه كانت تتبلع

لا يا ريتنا اخترنا اي حاااااااااااجه اصلا

********************

هانفضل طول عمرنا شعب غلبان وطيب وقريب

مزمار يجمعنا وعصايه تفرقنا

صعبنا عليا امبارح واحنا ما بنصدق اي حاجه عشان نفرح ونقول هيه هيه احنا مصريين ودي بلدنا وبنحبها

والله من حقنا اننا نحب بلدنا عشان حاجات تانيه كتير غير الكوره

ومن حق بلدنا تتحب برضه عشان حاجات تانيه غير الكوره

وعقبال الماتش الجاي ان شاء الله يعدى على خير

ونقول مبروك بصحيح بقى

التاج التاج التاج .... اوجاوبلك يا حبيبى التاااااااج

السلام عليكم مدونينا الكراااااااام

أولا وباديء ذ بدء

جائنا البيان التالي الى بيقول ان مفروسه الننوسه واحلى من البسبوسه عيد ميلادها النهارده

كل سنه وانتى طيبه يا مفروستي الجميله وعقبال ميت سنه سعاده وهنا يارب

وحشااااااااني يا بطه

وثانيا

جائنا برضه التاج التالي من دودو عاشقة الرومانسيه وحيث انها زنقتنى المزنق ده فانا مرقدالها برضه

هههههههههههههه

الى التاج السعيد

اسمك واسم مدونتك ؟

ما مكتوب على الصفه يا دودو بقى

احب الالوان ؟ الايام ؟ الارقام ؟

الالوان الازرق السمااااااوي

الايام والارقام عاااااادي كلها ايام ربنا والارقام برضه عااااادي

برجك ايه وتاريخ ميلادك ؟

ليه الاحراج ده

طب ينفع اقول تاريخ الميلاد بس ؟16 فبراير

الدلو يعنى من الاخر

اهم مميزاتك ؟؟

يووووووووه كتير ما انتم عارفين بقى ههههههههههههههه

لا اكتر حاجه باحبها فيها انى حقانيه الحمد لله تعالى ولو على رقابتي

واهم عيوبي ؟

ليه الفضايح دي كتيييييييير برضه فاضين لامته

عصبيه تقدروا تقولوا مجنونه . صوتي عاااالي حبتين . مش منظمه حبه واحده بس . وفى حاجات تانيه كتير مش فاكراها اكيد

حد جدع كده يعرفنى يطلع يقول هو

اكتر حاجه نفسها تبقى فيك ؟

نفسي اكون حاطه مراوح على قلبي واعصابي فى تلااااجه ويكون عندي قناعين ثلاثه كده ابدل فيهم عشان اعرف اعيش فى هدوء شويه

لا بس على فكره بعد التفكير العميق برضه كده مش هابقى مستريحه وانا اصلا ما نفسيش ابقى كده

لكن نفسي ابقى اكثر هدوءا فعلاااااااااااااا وابطل عصبيه وجنان حبه

ماهو مكانك المفضل ؟؟

مش هاقووووووووولكم عشان انتم قرارين بطبعكم

هههههههههههههههه

ايه هو هوايتك المفضله ؟

احتل النت المقام الاول حاليا فى قائمة هوياتي المفضله وبعد كده بقى يجى الطبخ والصيد والقرايه وفى حاجات كتير بس يعطوني حريتى

ما المقوله التى تؤمن بها ؟

يوووووه ده كتير اوي اقولكم شويه والنبى

اتقي فراسة المؤمن انه يرى بنور الله

ليس كل ما يلمع ذهبا

من يتقى الله يجعل له مخرجا ويرزقه من حيث لا يحتسب

وبشر الصااااااابرين

حرص ولا تخونش

اول عتبات السعاده هى الرضا

بس خلاص

اجمل هديه اتقدمتلك ؟

اممممممممممممم

مش هاقولكم برررررررضه لنفس السبب الى فوق عشان قرارين

اسعد يوم فى حياتك ؟واتعس يوم فى حياتي ؟
لا ما باحبش احسبها كده ابدا وما اعرفش ارد على السؤال ده ولسه الله اعلم بالاسعد والاتعس وربناما يجيبش تعاسه ابدا

موقف طريف لا يمحى من حياتك ؟

كتير يا اختي انا كل حياتي طريفه

ايه يا بت الاسأله دي

طيب اسمعي دي

مره كنت انا ورضا واحنا كنا مكتوب كتابنا خرجنا نقضي مشوار وبعدين قوم طلعت فى دماغنا نتمشى على الكورنيش

طبعا خالتكم صبرني ما تعرفش تمشي ساكته هاتك يا رغي ومناقشات بقى ايه من الى قلبك يحبها وحاجه يعنى موضوع عام بس ايه بقى المناقشه حميييييت وانا وهو شغالين بقى الله ينور واحنا ماشيين عاااادي جدا

قوم واد من الى بيمشوا على الكورنيش بورد مش عارفه مين ضحك عليه وقاله ان احنا بنعطف او كده هههههههههههههههههههههههه

فراح داخل علينا وبيقول لرضا ورد يا بيه

رضا بقى فى قمة الانهماك فى المناقشه الحاميه قاله ياعم اجري احنا لسه هنحب

الواد اتصدم ومشي وبعدين وقفنا كده احنا الاثنين بصينا لبعض وفتحنا فى الضحك

لسه مخطوبين وبيقوله احنا لسه هانحب امال بعد كده هاتقولي ايه يا واد عمي وكده يعنى هههههههههههههههههههههه

معاك ثلاث وردات تديهم لمين ؟

وبعدين فى هذا الاحراج

ورده لرضا وولادي يشموا فيها جماعه

وورده لبابا وماما واخواتي برضه جماعه

وورده لكل اصحابي القريبين مني اوي والى عارفين نفسهم ومش هاقولكم عليهم عشان نفسسسسسس السبب

معاك 3 رصاصات على من تطلقهم ؟

الاولى فى دماغ البقره الضاحكه

والثانيه فى دماغ ابنه

والثالثه فى دماغ الى يتشدد لهم

ايه رايك فى الحب ؟؟

الحب الحب الحب ؟ الحب حلاوته بالقنطار

ولمن تقول اجمل كلمة حب ؟ ده سؤال ده برضه

مش هاجاااااااوب عشان نفسسسسسسس السبب

هل من السهل انت تمثل الحب لشخص يحبك لعدم جرح مشاعره؟
لا طبعا اولا لانى مش باعرف امثل

ثانيا لانى لو عملت كده يبقى باجله جرح المشاعر فقط وكمان هاخلي الجرح يبقى اعمق واشد تاثيرا

المرأه فى نظر الرجل اهم شيء في حياته

الرجل فى نظر المراه هو محور حياتها اساسا

اسعد خبر سمعته هذا العام ؟ واتعس خبر ؟

مش عارفه مش لاقيه حاجه تعد خبررررررر جامد يعنى

اه استنوا لما البت حنين قالتلى انها حامل فرحت بشكل مش معقوووووووووول

عشان كده هاخليها تجيب بنت المره الجايه وتسميها على اسمي

هههههههههههههههههههههه

لمن تهدي التاج ؟؟

كل الى عايزه يتفضله مش عارفه بقى

عاجبك كده يا دودو بتدوسي على الزرار وتسبينى ارغي

اه نسيت اقولكم يا قراااااااااارين مين فيكم فقعنى العين التمام انا تعبانه من يوم ما سبتكم بؤي بيوجعننننننني

والدكتور قالي قدام اسبوع كده اعمل فيكم ايه دلوقتي

ماهو ما طلعتش من اديكم

يا حد عداااااااني يا حد فقعنى قرايه

اعترفوا بسرررررررعه الكرسي الكهربائي اهو على الجنب

سبونا نكتب

السلام عليكم

طبعا بقالي شهر مش عارفه اكتب ولا ارغي ولا اكل دماغكم عشان التجمع

بس يستاااااااااهل الحقيقه الواحد واخد دفعه مركزه من السعاده من يومها

المهم عايزه اكلمكم فى موضوع مهم اوي شايلاه فى قلبي وكاتمه من يوم ما نزلت البوست بتاع لمسة حب

الحقيقه انا بتهيئلي كنت اتكلمت فى الموضوع ده قبل كده ايام قصة قلب ايمان

لكن يظهر ان الواحد لازم كل فتره يديكم الجرعه

بعد ما نزلت البوست بتاع لمسة ايد الاقي بقى ناس خفيفة الظل هو ده حصل بصحيح ؟؟؟

والى يقولي عيب ما يصحش كده

والى يقولي داري على شمعتك تقيد

ايه هو فى ايه ؟؟

هو انتم ليه كاتمين على نفسي كده ؟؟

سبوني اكتب

مش لازم ترشقوا مناخيركم بقى فى دماغي وتعرفوا ايه الحقيقى وايه الي خيال

انا باكتب اي حاجه وكل حاجه

باكتب حاجات حصلت فعلا

وحاجات نفسي تحصل

وحاجات نفسي ما تحصلش

وحاجات شوفتها فى حياة اشخاص تانيين

وحاجات من دماغي كده افتكاسات يعنى

مش لازم اديلكم تقرير بقى انا امته فكرت فى الكلام ده وليه وكتبته امته

خصوصا ان انا بقالي 8 سنين واكتر باكتب يعنى بلاش غلاسه

البوست بتاع لمسة حب ده انا كاتباه من زمان حتى يمكن ناس من اصحابي المدونين انا وريته لهم قبل ما انزل البوست بكتير

ولقيته حلو انزله فى عيد جوازي يعنى مش قصه بقى ما تصدعونيش

هو البوست اصلا مش تهمه يعنى ولا قلة ادب والله

احنا كاتبين الكتاب يعنى مافيش مشكله

ههههههههههههههههههههههههههههههه

بس يعنى برضه بعينكم مش هاريحكم ومش هاقولكم بعد كده انا باكتب ايه وليه ومين وفين

وعلى فكره انا عندي حاجات كتير مكتوبه زي كده وكنت باتجنب انشرها عشان الغتاته بتاعتكم دي

بس خلاص انا خدت قرار اطنشكم خاااااااالث خااااااااالث وانشر الى انا عايزه انشره

اكتر ما يضايقنى هو حشريتكم يا مدونين

انا هاعلق ورقه على المدونه من بره بتقول مالكوش دعوه

ههههههههههههههههه

ايام لما كتبت قصة قلب ايمان فاكرينها ؟

ما تتخيلوش الاميلات بقى والتليفونات كمان

انتى تقصدي مين

هو انتى ايمان ؟؟ طب انتى صاحبتها ؟؟

والى يقولي انتى تقصدي مراتي ؟ والى تقولي جوزي شاكك فيا اصل اسمي ايمان

طيب اعمل ايه فى الشعب ده ؟؟

ارجوكم بلاش اللوك لوك بتاع الحريم ده وبطلوا تشغلوا نفسكم بحياة الاخرين

مش معنى كده ان الحريم بس هى الى بتقول لا لا ماهو في رجاله بتلك لك حريم برضه

لما حد يكتب حاجه قيموا الموضوع عموما بصرف النظر عن كونه يخص حياته ولا حياة العفريت الصغنن الى مربيه تحت السلم

قيموا الفكره قيموا الادب مثلا مش تقيموا حياة الشخص

على الله اسمع تاني حد بقى بيكلمنى على ان البوست بيتكلم عن حياتي الشخصيه ما لم اشير الى ذلك صراحة

واعملوا حسابكم المدونه دي مزوده بساطور واكياس ومقصله ديجيتال وكرسي كهربائي

وعلى راي الست

اعطنى حريتى اطلق يداااااااااااااااااااي