الأربعاء، 28 يناير 2009

قلب ايمان.....الثامن


يا بتاع النعناع يا منعنع يا بتاع النعناع يا واد انت
دي كانت رساله داليا  لايمان
والى قريتها وقلبها بيدق وبعدها خدت نفس وضحكت ودخل عليها اشرف
اشرف : بتضحكي على ايه يا ايمى ؟
ايمان : مافيش داليا باعتالي رساله
بتقولي يا بتاع النعناع يا منعع يا بتاع النعناع يا واد انت 
اشرف : اهاااا استر يارب من النق والنقاقين . اظن ما هي عارفه المناسبه قبلي كالعاده .
ايمان : اها مش هى نزلت معايا اشترينا الحاجه وبعدين عااااااادي احنا ستات بنرغي فى كل حاجه يا روحي ما تبقاش كده .
اشرف : طيب يا اختي .
ايمان: باقولك ايه يا اوشي  انا عايزه اجيب خط جديد .
اشرف ضاحكا  : مش عارف اول ما باسمع اوشي دي بامسك قلبي ليه وانتى مكتره منها من امبارح.
ليه يا ستى ماله خطك عيط ؟
ايمان: لا بس نازل خط عليه دقايق مجانيه كتير وارقامه حلوه قلت اغير بقى 
اشرف : ماشي مادام دقايق مجانيه . بس تكلمينى بيهم .
ايمان : اكلمك يا روحي . امال اكلم مين .
استاذ محمود ماعادش بيبعت رسايل واصلا هو عمره ما تجرا يبعتلها وهى مش فى الشغل لكن لما ايمان ما تعرفش ليه خافت لما جت رساله داليا قالت اغير الرقم القديم الى كان محمود لما طلب منها مره انها ترن عليه عشان مش لاقي موبايله وطلع كان سايبه على مكتب واحد من الزملاء والله اعلم دي كانت حجه ولا ايه .
المهم ان ايمان فعلا تاني يوم وهى راجعه من الشغل جابت رقم جديد وفضلت  على نفس النهج مع محمود نهج التنفيض العالي جدا
وعلى نفس النهج مع اشرف نهج التعطيف العالي جدا برضه
حاولت فعلا بكل جهدها انها تقرب من اشرف تبقى صاحبته اكتر من كونها مراته
اشرف احيانا كان بيتجاوب واحيانا لا
ساعات ده كان بيزعلها ويحبطها  لكن كانت بتحاول تتخطى الحكايه دي
حاجات كتير ا وي اتفقوا عليها خلال الشهر ده زي مثلا :

ممنوع منعا بااااتا الخصام اكتر من يوم يعنى ما يباتوش متخاصمين ابدااااا
ممنوع منعا باااااااتا دخول حد بينهم فى اي مشاكل ولا اهله ولا اهلها ولا صحابهم
يحاولوا قدر الامكان يناموا فى وقت واحد ويصحوا فى وقت واحد
اديهم على ادين بعض عشان بدل ما ايمان تعمل كل حاجه فى البيت والعيال وفى النهايه بيكون مافيش وقت يقعدوا مع بعض
اصحابه مره واحده فى الاسبوع عشان يبقى فى مجال يخرجوا هما مع بعض برضه
ممنوع مغادرة الطرفين او احدهما لفراش الزوجيه والنوم فى اوضة العيال
وبقى يدور الحوار ده احيانا
ايمان : اشررررررررف ممكن تعمل السلطه
اشرف : ايماااااان حرام عليكى والنبى سبينى اشتح  شويه
ايمان : هاااااااا وبعدييين ما انا كمان نفسي اشتح يا اوشي هو انا يعنى
خشب
اهو مره كان بيعمل ومرتين لا بس مش مشكله اهو حلو برضه
ونشوف كمان المشهد ده:
اشرف بيتفرج على الماتش 
وايمان قاعده جنبه بتقطع كوسه
  
ايمان : اشرف يعنى ايه فاول
 .
اشرف : ايمان هارتينى اسأله مش عاااااارف اركز
ايمان بزعل مدلع : كده طب والله ما عدت متفرجه معاك تاني هيه بقى
اشرف وهو بيضحك ويبوس ايدها بالكوسه : لا يا قطه ما تزعليش. بس والنبى حوشي الاسأله لما يكون اللعب واقف
 .
وكمان بقوا يعدوا قدام الكمبويتر نص ساعه بس او ساعه بالليل ساعات مع بعض 
ايمان كانت بدأت فعلا تحس بتطعم التغيير وسعيده به
لكن برضه الدنيا ما تخلاش من القلق
زي النهارده كده
ايمان على باب الشغل : صباح الخير يا داليا .
داليا وهى بتقلد ايمان المبوزه : صباح النور يا اختي . ايه الشراب المقلوب ده ما شوفنهاش من زمان مالك .
ايمان : مافيش  يا داليا .
داليا : ايه الحكايه بجد ولا ايه ؟  فى ايه يا بنتى ؟
ايمان : والله ما انا عارفه يا داليا كل ما اقول قربت خطوه احس انى بارجع عشر خطوات
.داليا : ليه بس ايه الى حصل تعالى نقعد عندي شويه وقوليلى حصل ايه
ايمان عدت على مكتبها الاول وبعدين راحت لداليا وهى بنفس البوووووز 
ايمان : الصبح يا ستى باقوله يا اشرف ودي انت العيال اصل انا كنت باطبخ واتاخرت طلع فيا وقعد يزعق ويقولي انا كمان متأخر و و و ......
داليا: طب ليه مش انتى كنتى بتقولي انه حتى كتير الايام الى فاتت بينزل معاكم بدري نص ساعه عشان يودي العيال ويوديكى لاقرب مواصله ؟
ايمان : اه والله كان بيعمل كده .
داليا : لازم بقى فى حاجه ما يمكن زعلان منك فى حاجه تانيه ؟؟
قولي واعترفي عملتى فيه ايه ما انا عارفاكي ما بتستريش حيك .
ايمان : يووووه بقى ما عملتلوش حاجه يا ستى والله .
داليا : بذممممتك .
ايمان وهى بتبتسم وهى زعلانه برضه : يخرب عقلك اقولها ايه دي ؟
داليا : تقري وتعترفي . حتى لنفسك انك اكيد عملتى بلوى مسيحه .
ايمان : ماهو اعمل ايه بس يا داليا ما انتي عارفه ان الموضوع ده بيتعبنى لما تقرب البريود وبابقى اصلا متعصبه وروحي فى مناخيرى .
داليا : تاااااااااني اعمل فيها ايه البت دي ما بتتعلمش .
ايمان : الللللله باقولك بابقى تعبانه .
داليا : هو انا قلتلك حاجه . بس يعنى قولتيله انك تعبانه بهدوء وعقل كده  ولا هربتي كالعاده ولا استغبيتى برضه كالعاده
ايمان وهى بتبتبسم بكسوف: لا استغبيت كالعاده.
وتعقب بعصبيه مفجأه : بس  ما هو المفروض عارف يعنى
داليا :  يعنى ما هو عارف ما يمكن ناسي معادك ما يمكن اصلا مش عارف ويمكن حبكت الله ما تبقى تنطقي وتتكلمي زي البنى ادمييييين اتفاهموا يا بشر انتم بنص لسان ؟.......طب قوووووومي يا فالحه صلحى غلطك بقى
ايمان: يعنى اعمل ايه يعنى وانا هنا .
داليا : بت انتى كان بدري عليكى الجواز مش بس الجواز ده انتى فاشله سنسنه وتعطيف كمان .
ايمان : ماشي يا فالحه اشوفك بعد كده بشراب مقلوب وشوفي هاعمل فيكى ايه .
داليا وهى بتضحك : ماشي عادي ما كلنا لها الشرابات المقلوبه .
المهم قومي يا فالحه ابعتيله رساله كده حلوه  تليق على  الموقف
ايمان : اقوله يعنى  ؟؟؟
داليا : البت دي هاتموتني خلاص . قومييييييي روحي على مكتبك هابعتلك رساله  من عندي حلوه . بس حاولي تغيري فيها كده اي حاجه عشان تبقى طالعه من قلبك .
ايمان : طيب يلا سلام يا ملكة  السنسنه والتعطيف .
وبعتت ايمان الرساله واشرف قراها وابتسم بنص بؤ

وقال فى باله : يا سلااااام . طيب ماشي لبسنا السلطانيه يا ستى
 .
ورجعت الحياه بمبى تاني والحمد لله
وبعد كام يوم  اشرف كان نزل يشتري شوية حاجات وايمان بترتب اوضتها وتشيل فى هدوم وكده لقت كارت تليفون واقع على الارض
ايمان : شوف الولاد . اكيد ده الكارت بتاعي القديم ايه الى خلاهم طلعوه من الدرج .
والله كنت عايزه من عليه رقم .
ولما خلصت ايمان شغلها راحت جابت الشريحه وحطتها فى الموبايل عشان تجيب الرقم .
ايمان بعنين بتبرق : ايه ده ؟؟؟؟
الشريحه دي مش بتاعتي ؟؟؟؟!!!!
ايه ده ايه ده ؟؟؟؟
ايه الاسامي الغريبه الى  على الكارت ده ؟؟؟
وبتاع مين الكارت ده ؟؟؟؟
يتبببببع..................

هناك 38 تعليقًا:

mony يقول...

كويس الاستجابة اللي من الطرفين ديه




و ربنا يستر علي اللي جاي

mayada يقول...

ام مريم البوست ده

للكبار فقط ههههههههههه

متابعه لما اشوف اخرتها

challenger يقول...

القصه جميله ام مريم
وبوست النهارده عجبتني فيه نقطه جميلة
ممكن للاسف تكون غايبه عن بعض الازواج
نقطة الصداقه..
ممكن يكون الزوج بالنسبه للزوجه زوج فقط ممكن يرتقي لمرحله يكون اخ اب بس نادرا ما يوصلوا لمرحله الصداقه.
مش بس الزوجه برضو الزوج نفس النظام

ولو قدر الاتنين يوصلوا مع بعضهم لمرحله الصداقة الحياة بينهم هاتكون سلسه وسهلة وجميلة لان شعور انك بتكلم صديقك ده شعور رائع بتحس فيه بامان من نوع خاص واستقرار
طبعا البوست فيه اكتر من نقطه اثارت اهتمامي بس من ابرز النقطا نقطة الصداقة اللي لو اتطبقت فعلا بين الازواج هايكون فيه طعم تاني للحياه بينهم

تسلمي ومنتظرين البقيه

Che يقول...

المفروض تعلقى على باب البوست ده انه للى اتجوزوا بس .... هههههه
كانت جامده الرساله بتاعت داليا بعد ماكلنا ظنينا الظنون بايمان
مستنى اقرا الاسامى اللى على الشريحه التانيه ... لسوء الحظ كلنا كرجاله عندنا بدل الشريحتين تلاته و اربعه
متشكر على جرس الانذار بتاع البوست اللى ضربتيه عندى .... ههههه

عمرو يقول...

أكره أنا شرايح الموبايلات اللى واقعه على الأرض كره العمى بصراحه :)))
ربنا يستر عليك يا أشرف شكلك كده حتاخد اٍستماره سته عن قريب
ترفقى بيه يا أم خالد و حياة عيالك ربنا وحده يعلم أنا خايف عليه قد أيه !!

حواء يقول...

هههههههههههههههههههههههههههه
والله لو طلع اللي في بالي مهرحمك ياعم اشرف
صحيح كما تدين تدان
وعفو تعف نسائكم

Soooo يقول...

ايه الفجعه اللي صابت الواحد دي ؟؟
لأ
قولي شؤرف عمل ايه؟؟
بسرعه الحلقه التانيه تنزل على ما اعمل مج فيسكافيه





سلاموووووووووز

Soooo يقول...

ايه ده؟؟؟
لسه برضه ؟؟؟؟؟

طب انا هاروح اشوف مصالحي وعايز لما ارجع تكون الحلقه نزلت





سلاموووووووووووز

Soooo يقول...

ايه ده؟؟
هي الحلقه لسه مانزلتش؟؟؟
طب انا هاروح اعمل شندوشت واجي ويارب تكون نزلت




سلاموووووووووووز

حنين القلب يقول...

اوشى بيلعب بديله ولا ايه ؟؟؟

هههههههههههههههههههههه

بت يا صبرنى امانه عليكى لو طلع بجد بيلعب بديله اقطعيه
بقى البت مموته نفسها ومش عارفه ترضيه ازاى والاخر يطلع كده

اعوذ بالله
هما كل اللى اسمهم اشرف كده
هههههههههههههههههههههههههههه

وحشتينى يا حبيبتى

شمس النهار يقول...

تمام تمام
الدنيا ماشيه حلو اهي
وشكلنا هنكد علي اطفش
مش عارفه ياصبرني يااختي
مابحبوش ليه
شكله واد رخم
ان ماكتبتي انه دخل عليها من الشغل يهزر والا دخل عليها بورده والا حزمة فجل حتي
لما نشوف

بنت الغربة يقول...

وحشتينى قوى ياصبرنى
انا عارفه متاخره عليك كتيير بس والله مشاغل وخناقات كالعاده
بس قريت اللى فاتنى كله
انا بحب داليا دى قوى
وبجد انا هاعمل كتير من اللى بتقوله
بس احيانا فعلا الواحد مابيبقاش ليه مزاج ولانفس ...يعنى يخنقنى الصبح وادلعه كمان بالليل ؟؟؟؟
صعبه قوى ياصبرنى...
عموما داليا معاها حق
مافيش حاجه تخنق الراجل غير ان مراته تحسسه انه مش مرغوب فيه..
ربنايصبرنا جميعا
تحياتى ياقمر
وادعيلى

صبرني يارب يقول...

مياده

اها للكبار فقط يا حلوه اطلعي بره هههههههههههههههه

صبرني يارب يقول...

موني

يارب ربنا يستر

صبرني يارب يقول...

تشالنجر

محمد يا منورني

طبعااااااا الكلام الى انت قلته ده تمام وانا اعنيه تماما من الاشاره له فى القصه

هى دي المعادله بقى الى ما حدش عارف يوصلها

تحياتي لك ونورت

صبرني يارب يقول...

che

الحمد لله يا ربي رضا عنده شريحه واحده وبتخضع للتفتيش الذاتي زيه بالظبط ههههههههههههههههههههه

وبعدين البوست ده للمتجوزين والى ناويين يا سيدى يتجوزوا

يعنى انت تطلع بره مش هانجوزك خليك كده ههههههههههههههه

صبرني يارب يقول...

زوجه

الحمد لله يا رب انى سمتيه اشرررررررررف مش حاجه تانيه

كنا خدنلنا مثلين فى دماغنا تانيين
ههههههههههههههههههههه

صبرني يارب يقول...

عمرو

استاذنا الى تقلان علينا فى التعليقات خالص وبيغيب ويقلقنا عليه

واشرف ما لناش بركه الا هو برضه ما تقلقش هانقرصه من ودنه بس

صبرني يارب يقول...

بيبرس

الموضوع مش بيبقى الم ومحتاج مسكن بس

حضرتك لو اشتريت تلاجه هاتقرا الكتالوج بتاعها

كمان المفروض تعرف الطبيعه البيلوجيه للكائن الى انت عايش معاه .

الحيض بيصحبه تغير فى الهرمونات بشكل دوري بيختلف من مرحله للتانيه على مدار الشهر وله اثار كتير حتى على الحاله النفسيه مش الجسديه بس والمفروض ان كل كائن فى المتجوزين يعرف الية العمل البيلوجيه للطرف التاني

ومش يستهون بها

واللوكاميه حاضر هابقى اوصيلك على الموضوع ده ههههههههههههههههه

صبرني يارب يقول...

اه صحيح سو وانت جاي المره الجاي اعمل حسابي فى الفسكافيه
هههههههههههههههههههه

صبرني يارب يقول...

سووووووووووووو

ايه النور ده

والله بقالي يومين عايزه ازورك وباقول اخيرا ظهر اهو بس مش لاحقه

انت عايزنى انزل الحلقات ورا بعضها كده لا اخلص منكم افطس هههههههههههههههههههههه

بكره بقى وعليك خير انا كتبت البوست ده ونمت لحد تاني يوم

صبرني يارب يقول...

حنين

نقطلعه ديله عنيه حاضر هابهدلهولك يا ستى
ولا يكون عندك فكر

وانتى كمان وحشااني والله

صبرني يارب يقول...

شموسه

حياااااااااتي

انتى تأمري بس هههههههههههههههههههه هانطلع عينه يا حبيبتى ما تقلقيش بس اهو نربيه اهو ابننا برضه

صبرني يارب يقول...

بنت الغربه

ربنا معاكي يا جميل
ويوفقك يارب

واه انا عايزه كل الناس تسمع كلام داليا

بس زي ما قلتلك قبل كده بالنسبه لك عايزاكي تحسي بنفسك شويه تعتدي بنفسك
وتحسسي جوزك بكده

الناس دايما يشوفوكي من خلال عنيكى مااااااشي ؟
الست الشاطره تضرب وتلاقي يارب تفهم ههههههههههههههههه

حسن حنفى يقول...

يعني ساعه ما الواحد يفرح ويحس انهم هيرجعوا تاني مع بعض زي الاول تعليقنا كده وتخلي الافكار الوحشه تيجي في دماغ كل واحد

:d

اهو الكارت ده مش عاجبني علي العموم مستني ان شاء الله الجزء الجديد

صبرني يارب يقول...

حسن حنفي

ولا عاجبني والله بس هانعمل ايه

نورت يا حسن

فشكووول يقول...

ام مريم .. السلام عليكم
قريت البوست
بس انا نفسى واحده زى داليا تكون صاحبة الحاجه .. ام داليا كده ..
تحياتى

صبرني يارب يقول...

استاذ فشكول

ههههههههههههههههههه

طيب ماشي عنينا للحاجه نبعتلها داليا لحد عندها قصدي عنينا لاستاذ فشكول ههههههههه

نورتنا والله

شمس النهار يقول...

وماله ياحبيبتي ربيه
ماهو ابننا هنرميه
بس انا شايفه يعني ان كفايه عليه دلع كده
حبة عين حمراء كده تعدل الموضوع
البنت تعبت معانا برضه

قوس قزح يقول...

ممكن اسأل هم كام جزء علشان انا عايزة اعلق و مستنية اخر حلقة


انتى ما صدقتى و الماسورة ضربت حلقات ورا بعض
و قال مترددة تكتب قصة
اومال لو مش مترددة كنتى عملتنى فينا ايه

عايزة اعرف النهاية بقى
التبات و النبات
ولا الواحد يكبر دماغه من دلوقتى


انا صحيح عايزة حق استغلال اسمى
هههههههههههه

صبرني يارب يقول...

شموسه

والله لسه مش عارفه انا هاعمل فيه ايه يا شمس بس بافكر

صبرني يارب يقول...

قوس قزح

والله يا دولي ما كنت اعرف انها هاطول كده انا كنت ناويه على جزئين او ثلاثه

بس مش مشكله بقى يلا اهو نسلي وقتنا عموما هما على م ااعتقد هايبقوا عشر اجزاء

ما انتى عارفاني فى الرغي بقىىىى

نورتي يا جميل

نونا مصرية بتعشق الحرية يقول...

الله

بجد القصة حلوة اوييييييي


متابعه ان شاء الله

صبرني يارب يقول...

نونا المصريه

تسلمي يارب ونورتي ويارب دايما منوره

حاسوباتيه يقول...

معلش بقالي فتره مش بعلق على القصه بس قرات الي فاتني دلوقتي عارفه اقولك حاجه انا على وش جواز اهو وكانت كتير بتخطر في بالي اساله عن الملل والروتين وهعمل فيه ايه في حياتي بجد بجد شكرا ليكي عاجباني القصه جدا جدا وانا مستفيده منها قوي بجد شكرا

أحمد (زوج مخنوق ). يقول...

طب سؤال يا صبرني الله يكرمك

تاني بند اتفقوا عليه ان مشاكلهم ما تخرجش من بينهم
و الست هانم من اول مشكلة راحت بعبعت بكل حاجة لداليا
طب فين الاتفاقات اللي بينهم بقى؟؟
ثم اساسا دي مشكلة ما ينفعش تتحكي لاي حد في الدنيا حتى لو كانوا متعودين يدخلوا طوب الارض بينهم
المفروض ان العلاقة الخاصة دي ما ينفعش تتناقش مع اي حد كده
انا شايف ان ايمان دي عايز قرص ودانها بشكل جامد جدا

صبرني يارب يقول...

حاسوباتيه

اي خدمه يا جميل وعنيه ليكى والله ونورتي وتنوري فى اي وقت

صبرني يارب يقول...

احمد زوج مخنوق

شوف بقى الخلط بين امرين مهمين اوي

معنى انها بتحكي لصاحبتها حاجه مش معناها ان صاحبتها دي هاتتدخل فى حياتها

لا ابدا

داليا هنا صديقه قديمه وقريبه اوي من ايمان وسرها معاها وكون انها بتحكي لها وتفضفض معاها مش معناه انها بتدخلها فى حياتها

التدخل مش معناه العلم بالمشكله معناه التدخل فى المشكله اصلا

زي مثلا انها تسمح لامها او يسمح لامه انها تكلم مراته فى مشكله ما بينهم

بمعنى ان يكون فى وسيط بين الراجل ومراته

اما بالنسبه للعلاقه الخاص فالمحرم في الكلام فيها هي شرح التفاصيل اما الكلام العام مش ممنوع ولا محرم بالعكس

المهم فى نقطه مهمه اوي هنا

داليا صديقة ايمان من عشر سنين

اشرف ما عرفش ياخد مكان داليا ولا يبقى صديق ايمان هو فشل فى كده

يوم ما يكون اشرف اقرب صديق لايمان مش هاتفكر تحكي لداليا على مشاكلها هاتقوله هو قبل داليا

مع استمرار قرب داليا من نفسها الا ان الزوج والزوجه لما بيكنوا اصدقاء بيكون ما بينهم رابط خاص جدا حباهم به ربنا لكن ما حدش اساسا بيفهم النقطه دي

تحياتي لك يا ابو فاطمه